Ram ya nisung tepsetba yimyim ka kümdaktsüogo: Nusrat Jahan

New Delhi, July 25 (Agencies): Trinamool MP, Nusrat Jahan-i, nashi kümzükertem ta ajartemi Ram tsüngrem tenüng ya nisung tepsetba yimyim ka kümdaktsüogo, ta ashi.
Jahan-i twitter ajanga, “Nashi shi achir mesüra nashi shibelener ta olulu nung ajemdaker nashi kümzükertemi sensotem amakba tatalokba aika lir. Sorkari ola madoker aser ibaji ajanga asenok kongshir. Nisung tepseter loktii Ram tsüngrem tenüng ya nisung tepsetba yimyim ka kümdaktsüogo,” ta ashi.
Actress nungi yimtenren nung ajemokla MP, Jahan-i, “Loktii nisung tepseter ya tanga kecha masü saka asen linük tsükchirtem lir, aser kiralongrartem lir,” ta ashi.
Nusrat Jahan-isa linük sensotem dang, linük nung tesempa nung ajemdaker ozüng alema inyakba mapatem aser loktii nisung tepsetba anema ola adoktsüla, ta mepishi.
Lai ashiba agi, Muslims, Dalits aser minority tem anema inyakba tatalokba timtibaji 2014 küm liasü.
“2019 küm nunga tesempa nung ajemdaker inyakba tatalokba 11 liasü aser nisung pezü tepsetogo. Parnok ajak ya minority tem lir,” ta lai ashi.
Item tatalokba atema sorkari ola madokba aija Jahan-i, “Yaküm July 17 nü Supreme Court-i loktii nisung tepsetba anema ozüng ka yanglutsü atema sorkar dang ashi, ajisüaka sorkari ola madoker,” ta metetdaktsü.
“Tan putu tasenba secular India nung lanur MP ka ama ni tang aliba sorkar aser MP ajak dang nisung tepsetertemi democracy amakba ya anentsütsü atema ozüng ka yanglutsü mepishir,” ta laisa ashi.