Dimapur Government College nung 53buba Freshers Meet agiogo

Dimapur, Chiteni/July 25, 2019 (TYO): Dimapur Government College, Dimapur nung July 25, 2019 Brehostibarnü 53buba Freshers Meet den repsema College Foundation Day sentong ayongzüka agiogo.
Iba sentong nung tongti o jembir ji Khekiye K Sema IAS (retd) liasü. Sentong tenzüka Dept. of Education, Asso. Professor, Rebainla Ao-i sarasadem. DGC, Principal, Kavili Jakhalu-i telok pela agizükba o jembidang lai, Freshers tem dang pei wadang nung meranga inyaka takoker ka ka akümtsü asoshi ajungshia liasü.
Laisa, iba college tenzüktsür temi taküm bendanga agüja inyaktsüba asoshi pelaba metetdaktsü. Seniors tenüng nung Mr Kibouwi-i o jembi aser Freshers tenüng nung Ms Nyuhon Moiya-i jembia liasü.
Sentong nung Khekiye K Sema IAS (retd)-i jembiba mapang, tanü kaketshirtemi pei jakla aser yimya yanglushiba ya tarutsü ajungtsü atema lir, ta ashi. Paisa, tarutsü nung junga liyonga aotsü atema pei taküm jenjang asadanga alitsüla, ta kaketshirtem ajungshia liasü.
Kaketshirtem rongnunga shisatsü agi tangar memenepba kaketshirtem nem mapang talila agüja aser nendaka sayutsü asoshi Khekiye-i tesayurtem dang lepshia metetdaktsü.
Maneni kasa sentong nung Academic Excellence atema DGC Awards tem: Dr Hokishe Sema Award (Arts stream) 2019 – Ms. Imsuienla aser L.T Yepthomi Award (Commerce stream) 2019 – Ms. Livikali Yeptho naprongla nem agüja liasü. Iba dak alaka, subject toppers nema Award agüja liasü.
DGCSU, GS, Viketo Sumi-i tepela anküp o jembi. Iba sentong nung Dr Hannah Tia, Asst. Professor, Dept. of Sociology mendenpula liasü.
Tanabuba sentong nung music aser entertainment shilem balala ajanga kaketshirtemi pei sempet tajung sayua liasü. David Mao aser Mhajani Lotha na Mr & Miss Fresher 2019 shima liasü.