Nagaland-i Angh, P B Acharya den tepila sentong agi

Kohima, July 25, 2019: Brihostibarnü State Banquet Hall, Kohima nung Chief Minister, Neiphiu Rio aser pa kinüngtsü, Kaisa Rio nati Angh mapa nungi anisüngzüksang, P B Acharya aser pa kinüngtsü, Kavita na nem tetushi agütsüba noksa nung angur.

Kohima, Chiteni/July 25 (TYO): Brihostibarnü State Banquet Hall, Kohima nung Nagaland sorkari Angh mapa nungi anisüngzüksang, P B Acharya aser pa kinüngtsü na den tepila sentong ka ayongzüka agiogo.
Iba sentong nung tepila o jembidang Acharya-i, loktiliba nung tepezük tia nung alirtem nem tashi magütsüra loktiliba tashi maittsü, ta metetdaktsü.
Pai teti jembia aruba oren, “Nagaland ya takar saka Naga nungerbo rongsenkettsüng makamait,” ta lepshia pai, “Tanü aliba kasa jenjang nung state malitsü, saka terenlok atema asenoki tanga state tem den tsüngkang medema jajatsü nüngdaker, kechiyong linük nüchiso aser terenlok atema Nagaland-ia tangar den kasa inyakogo,” ta ashi.
Iba dak sendakba nung pai, Angh tasenba, R N Ravi-i junga inyaktsü aser Naga yimtenren ken o latettsü atema inyaktsü, ta ashi.
“Naga yimtenren ken o ya küm ka tsüngdabo latettsüla, kechiyong Nagaland renloktsü atema teti asoshi yimjung nüngdaker. Iba ken o latettsü atema temelungtetba alir asen Ato kilonser, Narendra Modi lir,” ta Acharya-i ashi.
Paisa state nung aliba University pongu dang, shisaliok indang centres dangbo masütsüla, ajisüaka tagütsürtem asütsü aser loktiliba terenlok lenmangi anirtem kümdaktsütsü atema shisatsü agütsütsüla, ta ayongzük.
Naga nunger ajanga dang Nagaland tashitait akümtsü, ta shia Acharya-i, nüngdakba mapang ajak nung pai yaritsü, ta ashi.
“Ni iba state ya Angh ama toktsür saka Naga nungerbo metoktsür, anungji mapang ajak nung ni yaritsü,” ta pai ashi.
Kasa sentong nung jembidang Chief Minister, Neiphiu Rio-i, Angh ka ama Acharya-i loktiliba, shisaliok aser meimchir temeim mapa tajungtem inyakbaji teti bilemtettsü, ta ashi.
“Pa lenisüba ajanga ozü nübur aser state renlokdaktsüogo ta ni melung lema shiteter,” ta Chief Minister-i ashi.
State nung constitutional tekolak ka ama Acharya-i tatishitsü tajung sayua inyakogo, ta shia Chief Minister-i, “Tesüiba küm ishika state nung yimtenren mepetmesü liasü, ajisüaka Angh-i kanga shisa kaa inyakogo aser tatishitsü tajung yuja India Constitution nung ajemdaker inyakogo, aser iba atemaji pa nem tenüngsang agütsütsü tetemsü,” ta ashi.
Chief Minister-isa Acharya aser pa kinüngtsü, Kavita nati nisung tapu balala ajak Raj Bhavan, Kohima nung pelaa agizükba atema tena dang pelaba lemsatep.
“Kohima nung Raj Bhavan ya shingaia mayakettetba ki ka ama masü saka nübur ajak, talisa lanurtem meyong ka ama aküm. Nüburtem Angh ta na bilemtettsü,” ta Rio-i ashi.
Opposition Lenir, T R Zeliang-ia Nagaland Angh 19buba ama Acharya-i küm pongu kümsük tembanga inyakba atema tenüngsang agütsü.
TR Zeliang-isa 2015 küm August 3 nü India sorkar aser NSCN/GPRN na tsüngda Framework Agreement agiba aser Naga yimtenren telok teneti ken o jembiba nung adenba indang bilemteta jembi.
Angh ka ama Acharya-i item tongtibang tatalokba nung shilem tajung agiogo, aser ibaji ajanga Naga nunger putiotsü nung pa tongtibang ka kümdaktsür, ta shia pai Acharya dang, Naga yimtenren ken o junga latettsü atema nai maneni Naga nunger nungittsü ta amanger, ta ashi.
Iba sentong ya Chief Secretary Temjen Toy leniba nung agi, State Chaplain Rev Kuzierang Thou-i sarasadema sentong tenzüka liasü aser Deputy Chief Minister, Y Patton-i pelaa agizükba o jembia liasü.
Sentong nungsa Khedi Baptist Church, East Story aser Harmonic Voices teloktemi ken tajung aten.