Akümlir tongpang aser osang zülu

– A. Imdong Jamir, Sungkomen.

Osang – Washington Feb, 21, 2018.

Rev. Billy Graham America’s Pastor dies at 99. His final sermon “The cross Billy Graham message to America” called for a spiritual awakening. Osang züluri ashiba agi pa arishi küm 99 tabensa mapang Kibubai anizüker ao. Ameria kin dang tanula nung aka-asotsü anungtom mupong osang ajanga prokshir pa akümli tongpangji atem. “kida tenükshitsüka”. Anu tanabuba tasü tait akümlir tongpang nung nokinketer tajung Australian missionary Graham Staines and two minor sons Philip and Timothy burn to death on 22nd Jan, 1999. Pei apuani den tepila o mejembijungi ashi-longkar kabu nung akümli tempang anogo ishika lir God’s cyclone killed more than 2 lakhs people of Orissa news 30th Oct, 2006. Mangyangba kü meyong ni shia agütsütsü Ro 12:15 (c). Missionary kibongi akümli tamang tongpang tulu raraogo. Osang kaket nung, Ukraine nunger tamangdir ka shiba dang alimai tetsüng teka maketsang missionary ta aja pai kenü par lima Ukraine yimti ka nung nisung lakh 8 sentepdak Kibuba Yisu indang kuli agütsü. Pa tenüng evangelist Nick Vujice par kibong California nung alir. Tsüngremer sayatenya ya tesüngmangtsüka lir. Iba yagi Kibuba Yisu ya asenok dangi yakta arutsü ta sayur.
Temeim adianutem, temeim asen Aokin, nü dak, nü tamangji chichiba tamang, tako marok ajemba tamang, ala-ashi aremba tamang, yasa tzüra nung peisasaa tanüsa nangri kangshir nokdaktetba tamang, ali rongsen menükshiba tamang, alima pelaba menükshiba tamang, kenü anogo Kibuba Yisui pa nütsüngtemdang o ya ashi, shibaisa pa akaba ajak metoktsür pa kü nütsüng mekümtet. Lk. 14:33 Kibuba Yisui shinübaji missionary evangelist, pastor, deacon, tenzükba, tenükertem, anemsü jakla, taküm memerük (moral) tenükmerem, sen meimba, purden tila mekümtetba tabensa jembitetaka temeim mali angati ajungba kotak tenyar ama jembitetaka temeim melira kü nütsüng mekümtet. Charles Spurgeon shiba tanüla agi sünger jipa tang sayutsüngi pai ashi “periodical Godliness is perpetual hypocrisy” ano paisa jembi “A faith that never wept is a faith that never lived”. Otsü ka, Dr. I.Ben Wati shiba osang tajung zülur ka liasü, pai kaket zülur (asen Aor) ka dang yamai jembi temeim odi nai züluba osangtem kanga junger saka nü pen, nü kolomji onsara taju (sharp) techira. O tanaba agi nai züluba jagi nisung aiga temulong yirur ta ashiba sürnung. Anungji temeim tashi temetetertem tali Khristar arogo lenisürtem, samaba san bushirtem nai kechi zülur aji agi na kechi ar aji nai züluba jagi na sayur. Na süaka nü zülupanglu ji mesamai alitsü. Aji agi nür semchi semnur tashi tebu mejemtsü. Temeteter kati pai mulongba pai jangraba o mashi zülu ka zülur prok. Par yimer pa songtok temeteter katia pai metetba mapidangi o zülur prok, obendangdak talang ka senzür ang tempang. Iba dangji Dr. I.Ben Watii odi na pen techira ta ashibaji lir. 1875 küm, kenü Fira-d-sankey o D.L.Moody na Glasgow nungi Edinburg yimti-i train nung aodang Sankey osang kaket ka alia azüng. Magazine kaket tilaka pai züngshi nung mejipzüka aben. Yangji tesayuri sayuba tanur lesson kar san 99 mesamai lir. Iba oren pai shizüka aben. Sayutsüngir ana England lima nungi America lima Northfield nung sentep nung aten Sankey-i pai bena aliba sangro oren tila katu amer san 99 mesamai lir, tanüla kenji atendang America lima tamarener aiga mulongjang nung kongshi, sentep tesenshi-i o jembisang masü ken atensangto shiba? Ta jembitepa senshiba otsü lir. Sangro zülusang Ira-D-Sankey, D.L.Moody nunger ajak sümago, saka train nung shia aruba teshizük tila ka kong san 99 liasü iba ojang aser kensü tajung tanü tashi yuja lir. Temeim adianutem asenok kenü ali, ajungli küma aotsü saka nü zülu, nü o Kibuba Tsüngremi rizüngtsütsü. Iba jagi nür chirnür semchir tebu memjemsa zülutsüla, jembitsüla. Onük tantsür tambur, arishi küm 70, 80, 90 anogo shia leper len aortem que nung nokdaka alirtem, hazira moteter, aluru rui motettertem, tekülem sentepi pulua moteter, ki moker, kidang monger, semchiri meinpronga anogo aortem, kotaki aotsü menungra nenoki züluba arogo osang, alima osang, Aomilen, Tir Yimyim, Nagaland Post, kinütemi tetsü alu nungi adok yongya ama yongyar, tzürartem, kiliri anogo ah hazira (daily wages) angutsü yongyapa ama tamang agi kotaker ken atenba angaa nenok asoshi teti tanüla nung sarasademtsür. Iba osang azüngertem ajak kotaker tebui moajangma.
Amen