GRP puri Kamrup Express nung .22 pistol ka aser injang apu

Guwahati, July 29 (Agencies): Assam nung Goverment Railway Police (GRP) puri Deobarnü Howrah-i oyaa aliba Kamrup Express nung .22 pistol ka den injang 30 puogo.
GRP ketdangser kati ashiba agi, pistol aser injang ya train metsümeshidak tsüngbang nung menaloker yu lia ngutet. Pistol apuba sülen asateba agi, pistol kibur ya train nung senzüa liasü aser police ket nungi jenbotsü asoshi iba tesem nung miima ayu. Ano kaji iba pistol aser injang ya tangar kar nem bener yoker asütsü akok.
Ajisüaka state nung iba ama mesükba ken o aika ataloka aruogo. 2012 küm nungi tang tashi nung country-made pistols teku, Australian made 9mm pistols ana, 7.65 Italian pistols ana, Chinese .22 pistol ka, Air Pistol ka, Czech Republic made 9mm pistol ka, sparking rifle ka,.32 Revolver ka aser mortar firing pins pongu, ta GRP-i puogo.
Official sangdong ka ajanga ashiba agi, “ken o timba ka nung oset tem ya tebelenshir medeni bener yoker aser osang agiteper Guwahati mesera tanga stationtem nung iba ya agizüker. Idak nungji agi tatongtsüba tesem tonga bener aoer. Senotsü ajak ya hawala networks ajanga tsütateper,”
Kasa mapang nung ketdangser kati ashiba agi, ken o bushitsüngdangba sülen injangtem ya timba ka AK series rifles tem indang alir, koba railways ajanga shibelener.
“2012 küm nungi tang tashi nung GRP temi apuba injang 11,824 nung injang 970 bo AK47 indang liasü. Iba dak alia 9mm pistols 391, 7.62 pistols injang 126 aser 7.65 pistols injang 120 densema lir,” ta ketdangseri ashi.
Prangbong aser injangtem timba ka China nung yangluba tem asür aser item ya Dimapur nungi shibelener, koba ozüng alema benshiba prangbong aser injang shishilembadak ta züngshir. Telungpur aser prangbong injang shibelenertemi Myanmar nungi item oset bener adoker aser Nagaland O Assam adena linük nung tesem balalai belenshir.
“9mm injang aser prangbong tila injang timba ka Dimapur nungi UP, Delhi, Bihar aser West Bengal-i belenshir aser idak nungjiagi maneni tanga tesemi belenshir asütsü akok,” ta ketdangser-isa ashi.