China nungi Nepal tsür 44 pei talidaki shilang

Guwahati, Chiteni/July 29 (Agencies): Nepal nungi tetsür parnok 44 ashiokja China-i anir ao aser parnok ya Deobarnü Kathmandu tongogo, ta osang ajanga metetdaktsü.
Parnok ya China Eastern aser China Southern Airlines indang tayimtsü balala asem nung yoka liasü.
Tetsürtem ya May ita China aser North Korea arrtsülen aliba Dangdong yimti kübok Dandong Rishang garment factory nung inyaktsü asoshi yoka liasü. Pingalasthan, Gaushala tesem nung amenoka aliba foreign employment agency – Compass Recruitment ajanga tetsürtem ya yoka liasü, ta osang ajanga metetdaktsü.
“Tetsürtem nem ita shia ita sen dollar 400 agütsütsü nangzük aser kasaji Beijing nung Nepali Embassy-i attested asüba demand letter nunga shia lir,” ta Deobarnü Nepal sorkar ketdangseri ashi.
“Ajisüaka, parnok nem mezüng ita atema ita sen dollar 50 dang agütsü aser parnoki longkak aitba sülen talila dollar 100 agüja liasü,” ta ketdangseri metetdaktsü.
“Mezüng ita indang taa ngur sülen ang ashioktsüogo ta onoki yimdangi aru,” ta tetsür rongnung Sunita Limbu-i The Himalayan Times dang ashi.
“Iba agency ajanga onok dang paper balala nung sign südaktsü, kaket kar nungbo ita sen dollar 250 aser tanga kaket kar nungbo ita sen dollar 400 zülur liasü,” ta Limbu-isa ashi.