Higher Education Dept-i tepila sentong agi

Dimapur, Kuly 29 (TYO): Directorate of Higher Education-i July 29, 2019 nü Director, Dr. I .Anungla Aier aser Addl. Director, Dr. Watijungshi na mapa nungi sodi anguba atema tepila sentong ayongzüka agi.
Iba sentong nung H & TE Minister, Temjen Imna Along-i o jembidang “tepila sentongtem ya tejashi mapang masü saka benjungtepba mapang ka lir” ta ashi.
Ketdangser ana den külemi inyaksema arudang jangratema dang inyakogo aser tena nungi shisatsü aser tebilemba tajung aika angazükogo. Shisahir ka asütsübaji ajemalur ka aser meimchir meimer ka asütsüla aser ketdangser ana dang item yimya nguogo, ta Imna Along-isa ashi.
Shisaluyimba dak sendakba Department-i kanga dang süoki ia mapa inyaktsüla anungji nisung ajaki nendaka inyaktsü ayongzüker, ta paisa metetdaktsü.
Director menden nungi anener Dr. I Anungla Aier-i o jembidang “Ni aika angazükdang, aika memetetba akümer” ta ashi aser item o ajanga lai sodi nguaka la taküm len anitsü ta shisem.
Department-i ni anitetba atema kanga pelar aser ketdangser aser staff temi maneni kaketshirtem aser state ajungtsü atema bendanga agüja mapa inyaktsü ayongzüker, ta laisa ashi.
Additional Director menden nungi anener Dr. Watijungshi-ia tepila o jembidang pai ajangshia aruba indang lemsatep.
Paisa ketdangsertem aser staff dang tepila sentong tajung ayongzüka agiba atema pelaba metetdaktsü aser pa den yaritepa aruba atema pelabashi shisem.
Sentong nungsa Jt. Director, HE, Menuokholie Kire aser Principal, Mt. Tiyi College, Wokha, Dr. Apeni Lotha natia o tatsütsü jembia liasü.