NHRC-i Unnao aiürla yaritsüla

Uttar Pradesh kübok Unnao nung alir aiür ka dak tashiyim agi shi nung medemba onük ya India nung kanga tongtipang onük ka kümogo, kechiyong iba nung yimtenren aser ozüngren atsütepba tebilemtsü tulu ka ajurua lir. Iba onük ajanga India kübok tesem balala nung tetsürtemi aser talisa aiürtemi timtem ajuruba tali jangjashitsür. Talisa, iba onük ajanga linük nung teküpok jenjang nung alirtemi sentsü aketertem anema ken o mebenoktetba kuli jungkai adoka sayur aser yimtenren tashi ajanga ozüng amertem ajembanga ayuba tuteta sayur. Iba onük atema kanga dang taoksatsü aketba tatalokba kaji, tai tonglokja alisangi kuli ajak samatsütsü tasa atongba lir, aser iba atema aiürla aser kuli agütsürtem taküm samatsütsü atema inyakogo. Unnao tashiyim inyakba onük nung tongti süa tai tonglokja alisangji BJP MLA Kuldip Singh Sengar lir. June 2017 nung Sengar aser pa tenu den ano nisung kari aiürla dak tashiyim agi shi nung medem ta aiürlai tai tongokja lir. April 8, 2018 nü aiürlai Uttar Pradesh Chief Minister Yogi Adityanath’er kima nung la sasa mi agi rongsettsü merangba ajanga iba osang yimjak nung meteta aküm. Iba ya masüdang aiürla tebui MLA’er kinungertemi den ashishitepdang, pa züka merenshia liasü. Iba tatalokba sülen kibong anapronglai police tsüngdang FIR tem benok saka police-i FIR ka dang agizük aser tetsürla tebuji Arms Act onük dak sendakba nung tai tongokja apu. Tetsürla tebuji tepuokdak lia asü aser post-mortem report nung pa mang nung zübo 14 aliba nguteta liasü. Tetsürlai la sasa sosettsü merangba sülen anogo ka lir tebu asü. Tetsürla tebu asüba sülen UP Crime Branch-i MLA tenu Atul Singh Sengar den MLA den yariteper nisung pezü apu aser bushisüngdang asütsü tetuyuba agütsü. National Human Rights Commission (NHRC)-ia iba tatalokba süoki ia agizük aser UP sorkar, police aser chief secretary dang nungi osang tejangja meshi. Iba sülen jiang UP sorkari iba onük CBI nem agütsütsü tetuyuba agütsü aser April 12, 2018 nü BJP MLA Sengar apu. Ajisüaka, police-i Sengar apudang, aiürla tebu tanuboa ken o tejen ka nung tai tonglokja apu aser tang tashi pa tepuokdak yua lir. August 2018 nunga aiürla posema kuli agütsür tongti nisung ka- Yunus Khan ajungbena asü saka pa asüba osangji CBI nem mesangoktsüi dang police-i arem. July 28, 2019 nü aiürlai tebu tanubo den ajuruteptsü atema aodang len tom nung truck gari kati parnok amenba gari dak atsük. Idangji aiürla tetsü tanutsü ana tsükset aser la den la atema okatsür kanga mejungi yirur anepaludar. July 28 nü lendong matalokdang UP police-i BJP MLA Kuldip Singh Sengar dak kecha tai mali ta kuli agüja liasü, saka Deobarnü gari lendong nung nisung ana tsüksetba sülen police-i pa dak tai tongoktsüogo. Aiürla tebu tanuboibo iba tasa ya MLA Sengar-i atonga inyakba liasü ta tai tongloktsür. Deobarnü atalokba gari lendong nung taitsü keta lir aser ibaji truck gari indang registration plate ji grease agi mezübanger liasü. Unnao onük asoshi UP sorkar aser police-i MLA kümzüktsü meranger ama aser külen CBI-ia mapa shitak meinyaker ama ajiteter kechiyong yaküm July ita CBI-i ken o asem nung MLA dak tai tongokja lir. Onük kaji tanur ka dak tashiyim agi shi nung medemba, ka aiürla tebu asüba aser ka taila ken o ka nung aiürla tebu aitsütsü merangba lir. CBI-i item ken o tem benokaka tanü tashi item ken o okadak angadangtsü atema mebenok lir. Tang aiürla kanga mejungi yirua lir aser lai kuli magütsütetra, iba onük tashi mait akümtsü ana nung dang lir. Asenoki reprangdangra, India nung tangsa tang okadak benoka obendang agütsütsüba ken o aika tatemtsü balala shia atsülangba angur. Item onüktem rongnung Unao ken o ya ka asütsü. Uttar Pradesh sorkar aser police den ano CBI-i iba ken o atema mapa shitak meinyakteter süra, sentsü alir ka jenbudaktsütsü mechi nung tapayutsü taküm aika melaludang, National Human Rights Commission (NHRC)-i Supreme Court dangi oa tekaratiba nung ochi obendang angutsü atema inyaktsüla.