Yimdaklirtemi Chiephobozou water project noktanger

Kohima, July 30 (TYO): Kohima district kübok Chiephobozou Rural Development Block nung yimdaklir aikati tanü Nagaland sorkari water supply project tenzüktsüba mapa anendaktsü.
Zhadima Village Council-i anir yimtsüng balalai iba mapatong noktanger. Yashi Public Health Engineering Department (PHED) indang Principal Secretary dangi parnoki tanü agitsü aliba sentong magizüker ta shidi ka zülua liasü.
Ajisüaka, tanü Minister N Jacob Zhimomi-i anir PHE department-i mapatong inyakba tesemi oa yimdaklirtem dang iba mapa tenzüktsü atema mesüzüktsü merang.
Idangji yimdaklirtemi tejashi nung Zhadima zero point nung minister aser pa meina arurtem noktanga liasü.
Yimtsüng 24 nung klen shia nem water supply pipe meinoktsü tashi parnoki iba mapatong noktangtsü, ta Zhadima village Head Gaon Burah (GB) Kedilezo Mere Keditsu, Village Development Board secretary Roko Angami aser youth president Vizosielie Khoubve nungertemi ashi.
Yimtsüng aika nung mapa matemba agi onoki iba sentong noktanger. Water treatment plant indang ali kiburtem süaka department-i parnok dang meshii iba sentong agitsü ayongzük, ta parnokisa ashi.
Tanü Minister Jacob Zhimomi-i yimdaklirtemi ashiba onüktem angaba sülen “iba mapatong ya 2011 küm tenzük saka metembanga liasü. Ni PHED Minister akümba sülen ang yaküm March ita nungi iba mapa inyaktsü tenzük” ta pai yimdaklirtem dang ashi.
“Taoba mapang kechi atalok’ar ni memetet saka yimdaklirtemi iba sentong agitsü memulunger ta department ketdangsertemi kü dang ashi saka ni iba osang tali jangjaa metettsü atema yangi aru” ta paisa ashi.
“Mezüngbo iba mapatong ajanga Chiephobozou RD Block kübok yimtsüng 24 nem water supply agütsütsü atema tenzük saka tenem-tekong aser tanga technical tebilemtsü kar aliba ajanga ibaji meinyaktettsüsa aküm. Iba jagi department-i DoNER ministry nem osang sangoktsü aser mapatong shilem lemsar yimtsüng 10 atema dang inyaktsü telemtetba agi” ta Minister-isa metetdaktsü.
Iba mapatong nung inyakyim melenshiba ya yimdaklirtem dang mesangoktsü aser iba jagi mangatettep adokogo. Iba scheme kübok kilen ajak nem pipe connection agütsü lateta mali, ajisüaka yimtsüng 10 nung reservoir tanks aser respective khels (sectors) nung connection atema dang lateta lir, ta paisa shisem.
Tanüngba yimtsüng 14 nung 2024 tashi nung deep tube wells atutsü aser tanga nüngdaktem Jal Shakti Ministry dangi osang yokogo, ta Zhimomi-isa shisem.
Yimtsüng 10 nem supply pipes agütsüba mapa tembangogo aser tanüngba yimtsüng 14 atema mapaji taküm December ita tashi nung tembangtsü. Anungji, tanü iba mapatong tenzüktsü atema temelaba agüjang, ta Minister-isa yimdaklirtem dang mepishi.
Iba mapang Advisor to Chief Minister, MLA Zhaleo Rio aser Principal Secretary to the Government, Maongwati Aier nati Minister den yarisema jembi.
Ajisüaka, yimdaklirtemi taoba mapang nangzükba ama yimtsüng 24 nung kilen shia nem water pipe connection magütsü tashi mapatong metenzükdaktsütsü ta tekong meranga noktak.
1985 küm Nerhema aser Zhadima yimtsüngtem atema iba mesükba mapatong ka tenzük saka mapatong tenzükba sülen kecha meinyak. Anungji, December ita tashi nung mapa tembangba sülen ang sorkari iba mapatong tenzüktsü akok, ta Zhadima village lennirtemi ashi.
Yimdaklirtemi ashiba angaa Minister aser department ketdangsertemi meyipa aru.