Nagaland & Manipur minister temi “Happiness Class” nung aden

New Delhi, July 31 (Agencies): Madhya Pradesh, Puducherry, Nagaland aser Manipur nungi Education Minister tem den ketdangsertemi Delhi government school ka nung ‘Happiness Class’ nung aden.
Ladakh Hill Council nung Councillor-in charge Education Konchok Stanzin-ia Delhi Education Minister Manish Sisodia den külemi iba school semdanga liasü.
“Education ya politics den pila ayutsüla. Delhi sorkar school tem nung Sisodia-i mapa inyakba ya tenüngsang agütsütsüba mapa ka lir. Ni kodang Education Minister aküm, ni Delhi education reforms osang angazük aseer ni yangi kechi koma inyaker’ar reprangdangnüa liasü. Deputy CM-i ni jaokba atema kanga pelar” ta Madhya Pradesh Education Minister Prabhuram Chaudhary-i ashi.
Madhya Pradesh ya Delhi dang nungi balaka lir saka tesem ka nung langka tajung inyakra, asenoki ibaji angazüktsüla, ta Chaudhary-isa shisem.
Delhi sorkari Happiness Curriculum tenzüker küm ka ajungba benjungmung nung shilem ka ama yimtenren lennirtem aser shisaluyimba nung mongintemi Delhi sorkar school tem semdanger.
Puducherry Education Minister R Kamalakannan-ia “iba curriculum ya kanga junger” ta ashi.
“Sisodia-i inyakba mapa ya kanga tajung aser iba ya India ajungalen ajizüka inyaktsü akok. Onoki Chief Minister den jembiba sülen Delhi education department den MoU ka sign asütsü tebilemba lir” ta Kamalakannan-isa shisem.
Nagaland Education Minister K. Tokugha Sukhalu-ia ashiba agi “iba curriculum ya ajizükba benshitsüla. State ajaki Happiness Curriculum ajizüktsü imlar kechiyong iba ajanga tanurtem renlokdaktsütsü aser linük tashitaitba akümtsü.”