HIAAM-i lenir Tony Marak aser kinüngtsü ajuru

Dimapur, Sept. 17 (TYO) : Mapang talang ka nungi yongyaa aliba Haggai Institute Alumni Association, Mokokchung (HIAAM) züngsemtemi Haggai Institute nung International lenir Tony Marak aser kinungtsü na Sept. 13, 2015 nikongtsütsü Hotel Metsüben nung ajurutepa sarasadem mapang tajung agia liasü, ta metetdaktsü.
Iba mapang Tony Marak-i Aor lenir Rev. Dr. I. Ben Wati aser Rev. Longri shirnoki Khristan lenisüba nung shilem tulu agia liasü, parnok ngua pa temulung kanga achiba shisema liasü. Pai ashiba kaji, asen taküm ya football asayaba ka mesüka lir, kechiba süra asenoki ground nung goal post meli football-ji masayar. Anungji Khristan lenir ka ama asen taküm nung nükjidong alitsüji kanga tongtipang ta shia liasü.
Pa kinungtsü-ia Haggai Institute-ji kanga temeim aketba riju ka lir, kechiba süra iba nungi Khristan lenir aika adokdaktsür. Laisa ashiba kaji, lenisüba ya asen taküm yimya (life style) ka lir, anungji asenok ajaki Yisu jilo ajizüker ka ka asütsüla, ta ajungshia liasü.
Rev. Noklen, Pastor-i sentong ketdangsüa liasü aser M. B. Longkumer, President, HIAAM ajanga tarutsü nung ano iba telok tali tashi taitba nung aotsü ayongzüka agiogo, ta sangdong ka ajanga metetdaktsüogo.