Tsüngrem bilemtetba benjong

Taküma ibai Tsüngremmong mapang lir. Akhidang asübo yimtsüng ajak nung nashi ak tepseta yur kinunger, medemer aser züngapurtem adenshia yi jemtepa yartsüngsanga ken tentepa pelatepa lila. Ajisüaka, tanü asüngbo benjongsa asüyonga asenok aikati Tsüngremmong yabo benjong masü amai süidaktsür. Iba jagi nisung teimbakati akhi alu mapai aor aser kecha balaka benjonga memongi süidaktsür. Ajisüaka, tajung kaji, benjongsa memongaka asenoki Tsüngremmong tetezü temoatsü ajak Tsüngrem nungi arur, anungji Tsüngrem tenüng asangtsüla tabo angateta alinungji, pei kibong nung aser tenla kidang sarasadem mapang tajung ayongzüka Tsüngrem nem tenüngsang agütsüba mapang agir. Ano, ibajiang tajungba. Atangji, tanü asenok rongsen jenjang reprangdangra, nashi ak tepseta benjong amongtsüba tia nung kibong aikabo mali. Kibong aika pei nüngdaka meperitetter aser ano nisung aika benjong monga kazütsü mapanga mali petteper, anungji aikati benjong amongtsüba ya mejangrar. Iba tia nung tanü asüng asenok Tsüngremmong aser Moatsü ama benjongbentsü amongba yimyatem kanga melenshiogo. Atangji, tsürabur tajung aikati akhi tsürabur sobaliba tajung meindoki benjong tenüng nung  kidang ak kabo mesüra nashi kabo tepseta kinunger medemertem nem shijep agütsür aser kidang külemi chiyongtsü sentonga yanglur. Iba jagi Tsüngrem temeim bilemtetba den külemi ano kinunger aser medemer aser kidang kiyongertem rongnung temeim akangshir. Iba ama sobaliba tajung yabo tanü lanurtemia jilu ajizüka benshitsüla. Benjong amongba nung ya mapa aika sendaka lir, kaji teyanglur Tsüngrem bilemtetter aser tangar den tesendaktep akangshir. Ano tongtibang kaji, benjong amongtsü bilemra, iba jagi khureta agütsür, kechiyong benjong amongtsü asoshi jelia rongsen bushitsüsa akümer mesüra kidang ak kabo mesüra anabo ajeptsüla adoktsü. Iba jagi küm piyong mapa meranga inyaktsü ajungshitsü. Akhidangbo, kidang kibong nung benjong memongtetbaji maksü liasü, iba jagi balaka meranga inyak. Tanübo asenoki benjong amongtsü tebilemba liaka meranga meinyaker, kechiyong tangar dang meshia benjong amongtsü bilemer. Benjong amongtsü atema kija meshimetsüa senzübajibo yutsür, asenok yimten aser loktii benjongmong sentong tulu ayongzüker aser iba benjongmong nung endokba sentsü menokdaktsütsü asoshi tulur mesüra takar kar jaoker. Item dang nung jagi senotsü dang imlar ser nung parnok mulung peladakja ken tajung mejema tenloktsür. Tanü iba sobaliba agi asenoki memeteti asen lokti rajang kümdagi. Ano, benjong amongba sobaliba tasen kaji tang amai Tsüngremmong den repsema government-i amongba Hornbill benjong amonger. Atangji, government-i senotsü agüja sobaliba benjong mongdaktsübaji junger, ajisüaka Tsüngremmongbo Tsüngremmong aser Moatsü benjonga moatsü ta Hornbill den memeyoktepti bendangbendanga amongtsüla. Hornbill benjong mapang yabo December ita mezüng hopta lir, anungji Nagaland tesem ajak nung kasa mapang nung kasa benjong amongtsüla. Alima nung aliba kin aser loktiliba shiai pei pei benjong amonger. Tetezü benjong ya nisungtem sobaliba nung shilem tongtibang ka lir. Mapa mapa dang inyakbajia masü saka kenkenbo anisüngzüka pelateptsüla aser temoatsü ajak Tsüngremi agütsür ta asübaji tarutsü putu ajak nung mamadoktsüsa, yimten aser lokti tentettemi dang masü,  arogoia Tsüngremmong aser Moatsü mong sentong tajung renema akatsüla. Iba jagi asenok saobaliba aser tamang na prongla nung tashi taitba akümtsü.