Turkey nung mi agi Khristan yimtsüng trok rongdok

Ankara, Luroi/August 01 (Agencies): Southern Turkey nung mi agi Khristan yimtsüng trok rongdok. Turkey aser Syria arrtsülen ELbegendi, Guzelsu, Dibek, Uckoy, Ucyol, aser Dagici yimtsüngtem rongdokba mi ya asaa jangrodaktsüba südi, ta temulung melemteti lir, ta Faithwire Reports ajanga ashir.
International Christian Concern ajanga ashiba agi, ki-o-jen raksatsütsü nükjidong nung mi senloktsüba ya telungpurtem tasa tasen ka lir aser parnoki yimtsüngtemi züsentetba nung tenük yoker.
Taoba hopta Turkey nung olive süngdong 700 nungi 800 tashi rongdok aser iba mapa ya telungpurtemi inyak südi, ta temulung melemi lir.
Tawa tanü Turkey nung iba amala mi lendong atalokba ya metetsümonga inyakba maparen ka lir, ta ketdangsertemi temulung malemer, kechiaser Syria aser Iraq linüktem nunga aloyimertem anema mi ya amshir. The Telegraph ajanga ashiba agi, iba region nung May ita nungi tenzüka tang tashi nung ali hectare 50,000 mi agi rongdoktsüogo aser iba ajanga sem million $50 jenjang akoksaogo, ta ketdangser katu The Guardian dang ashi.
Mi ajanga linük nung chiyongtsü anünga aliba ano tali timtemdaktsür. Kasa mapang azüdokshi ajanga alo nungi adokba chiyongtsütem shilem asem nung shilem ka agi tajemba kümdaktsür, ta mongintemi ashir. Iba den bendenloksema chiyongtsü kanga ajema züsentetba ajanga nisung million 6.5 taküm lendong nung yutsür aser ano nisung million 4 chiyongtsü agi anünga akümtsü.
Fowaz ta ser nisung kati mi lendong indang jembidang, linük nung taküm chiyongtsü tajungtiba züsentettsü imlaa liasü, ta The Guardian dang ashi. “Linük nung chiyongtsütem junga züsenteter joko küm 60 dak tali jungogo. Tesüiba küm tem nunga kanga anepaludang saka junga mezüsentet. Taküm ya tajungtiba ta imla liasü,” ta pai ashi.
Syriac Khristanpur dak timtem balala ataloka aruba rongnung tang atalokba ya tasenba lir.
Arrtsü nung Turkey sepaitem amenoka aliba ajanga Syriac Khristanpur amokmerener amai bilemer aser parnoki United States dang teyari meshi, ta taoba mapang nunga sangdonga liasü.
Syrian Military Council ajanga iba tesem nung tensa azüoktsü indang sangdong ka nung metetdaktsü. “Turkey aser Northern Syria arrtsülen aliba Tal-Abyad area nung Turkish Army temi jara agien tenzükogo. Yangji Turkey sepaitem aser jihadist tem timba lir. Parnoki Northern Syria amaktsü nükjidong aliba tejangja sayur,” ta Syrian Military Council ajanga sangdonga liasü.
Parnokisa ashiba agi, “Turkey-i onok tepseta aser ozü kin ajunga samatsütsü nükjidong lir. Tang tashi NE-Syria nung Syriac Khristan 100,000 dak tali lir aser Turkey-i makra parnok tepsettsü mesüra meindoktsü.”
Syriac Khristanpur teyari meshiba asoshi US-i yimjak nung telangzüba kecha agüja mali, saka Turkey nung ketdangsertemi mi remsepba den külemi iba lendong indang bushisüngdang tenzüktsü, ta metetdaktsüogo.