Longsa yimtak nung Tsüngremmung amung

Longsa Tsüngremmung sentong nung tongti tejaoker MLA Sharingain Longkumeri telok den külemi yimdong süa shizüngzü (Shayangzü) atsür aoba mapang tangokba noksa nung angur. Longsa, August 1, 2019.

Longsa, Aug. 1 (TYO): Nagaland Tourism Department den yaritepa Longsa Village Council-i Longsa yimdak Tsüngremmung sentong tulu ka Aug 1 nü ayongzüka mungogo.
Tanü iba sentong nung Nagaland Higher & Technical Education Minister, Temjen Imna Along tongti tejaoker liasü saka pa koda masüba sorkar maparen kar ajanga marutet nung, pa melena MLA & DPDB chairman, Sharingain Longkumer tongti tejaoker ka ama arua benjung kanga meraketdakja liasü.
Pai tanü iba sentong nung jembidang, pa MLA kümer külen mezüng Longsa yimdaki aittsüsa maongka tulu anguba asoshi mezüngbuba pelaba lemsatep.
Asenoki khrista memetetba mapang asen tetsüteboui Lijaba, Meyutsüngba, Longtitsüngba ta tsüngrem balala külema aru, saka tanübo Tsüngrem tejangja meteter asünung, Tsüngremmung amungba mapang asenoki asen teyanglur Kibuba Tsüngremi kechisarena moatsüba asoshi tenüngsang agütsütsüji tim lir, ta pai ashi.
Tanü alima kara ainba mapang sobaliba tasen tasen aika adoker, aji saka, ibaji asen sobaliba den tesentaktep kecha mali, saka tanü Aori Moatsü aser Tsüngremmung pelatepa amungba yabo asen miim maitsü aser senmang lir, anungji, ibai mesamadaktsüi wazüka benshitsüla, ta paisa ayongzük. Tsüraburi asen nem koba otsüolem aser sobaliba tajung yuja lir, ibaji mamatoki tarutsü lanu putui amangtsüla, ta paisa shisem.
Longsa yim ya Tourist yim ka asütsüsa shirnoki tarutsü mangdang tulu yur inyakogo, ibai kanga shisa kaa inyakba mapa ka lir, ta pai ashi. Longsa Tsüngremmung sentong ya tarutsü nung bendangertem jaoka benjung tulutiba amungtsü nükla ayutsüla, ta paisa shisem.
Longsa Tsüngremmung sentong nung yimertem dang masü saka kishikina yim balala jaoka amungba ya jangratemtsü aser ibai telungjem temaitsü lir, anungji, Longsa nungi tangazüktsü aika nguogo, ta paisa tenüngsang agütsü.
Iba sentong nung Longsa nunger telok balala den ano Surumi (Sumi) aser Pirahir (Sangtam) yim nungi akhi yimya nung sobaliba yar tsüngsang ajanga shilem tajung aika liasü. Kazütemjen Tatar ajanga Tsüngremmung ratet ashi. Sentong nung Longsa Village Council Chairman Aochuba, CEO IDAN & taoba Chief Secretary Alemtemshi Jamir aser ano tangartemia shilem balala agia liasü. Longsa Tsüngremmung sentong ya August 3 tashi amungtsü.