Ni tang shitak ta bilemba shisatsü yabo endokdi ni ???

~ L. Kika  Pongener.

Asen mimchir dak aketba tashimait tulutiba kaji “Ni dang shitak” ta bilemba shisatsüi ya asütsüi. Iba shisatsüi yagi asenok adenba lokti ajunga nung teronem tanang mekadaktsüir aser telongjem temeimtep samadaktsüir. Aji oda, nisung karibo ni jembiba, ni inyakba aser ni angatetba ya dang shitak, saka tangari jembiba, inyakba aser angatetbajibo meshitak aser menungdak ta bilemer, ibajagi lokti asen nung telongjem temeimtep malir aser nubur tsüingda tesentaktep tajung raksatsüir. Tanu putu ya tashitemetet putu ka asünung, yimsusur nungi shir loktiliba ajunga nung lennirtemji shisatsüi temetetba akaba nisung, pei kin sobaliba tejangja metetba nisung, Tsüingrem nungi anguba shisatsüi tarok akaba nisung aser mangdang akaba lennir nungdaker.
Atangji yimsusur nungi shir loktiliba ajak nung lennirtemji ochishir, tasütait aser lenla ajak nung takotet nubu nungdaker. Ajak dak alaka, lennir kaji tulur-tilar ajak den kasasa liromedema litetba, tangari bilemba aser angatetba-a tim nungbo hau ta agizüktetba lennir asütsüila. Tejen putu nung Yihuda nunger ozüng meteter Farise nisungtemi pei sasa parnokji tangar ajak dang nungi balaka alakteta ‘Temeshi’ nisung ta bilem, aser parnoki metetba aser angatetbaji dang shitak, saka tangari inyakba mapa nungbo ajak nung tai pua ashishiba tesayurtem liasü. Tanu asen putu nunga Yihuda nunger Farise Temeshi nisungtem amaji, tashir-tawar karibo pei-i inyakba mapa mesura pa/la dener inyakba mapa dak alaka tangari inyakba mapa kecha agia mulung masüba aser tenuk mesungba-a lir. Alima nung nisungi inyakba kechi mapa sudir suaka ajak nung metokmeperi terabosa alitsüi, oda noklang nung noklang shitakbo masütsüi akok. Anungji kati ka metongshiteptsüibaji kanga tongtipang, saka tenuk nung anak aiba endoktsüidang tenuk shipoka toktsüi amai masütsüila.
Anungji akokba tashi kati ka akümtsüibua tim nungbo kati ka nem tenungsang agütsüitsüila. Asen lima nung küm aika dang kati ka ajongshiteptsüi aser metongshiteptsüi atema sabang (Platform) tajung makaba ajanga nubur tangatetba lemsatepdak sabang ka maka lia aruogo. Ajisuaka, tanubo asen lima nunga anogo shia osang kaket tapu balala, oshi ajak nung adokba agi nubur ajunga pei tebilemba aser tangatetba tangar dena lemsateptsüisa sabang anguba ya maongka ulura. Anungji iba sabangji nubur temulung yirudak sabang masü saka nubur ajangzükdak sabang ka amai amshidi. Ajak dak alaka, alima tejakleni aoba den jangyu medema asen oshi agi asen tangatetba aser asen tebilemba nubur den lemsateptsüisa asen oshi nung osang kaket ‘Ao Milen’ aser ‘Tir Yimyim’ akaba ya kangasa maongka tulu lir. Iba osang kaket ya Aor atema dang masü, Naga nunger ajunga atema shisatsüi angudak ‘Tzüpo’ aser arangshidak ‘Longzük’ lir. Anungji asenoki iba osang kaket ana ya arr meketdaktsüii wazüka yudi. Tanu putu ya tashitemeteter, takataiter, tangateter teimba aliba putu ka asünungji, yimten yimsusuba bangdak nungi shir loktiliba inyakyim ajunga nung nuburtem azüoktsüi atema temzüng-ozüng tapu aika yangluaka, saka item temzüng-ozüngtem jagia nuburtem azüoktsüi makoker, kechiyong nisunger tashitemetet onsara ulura küma-adok. Ajisuaka, item ajakji melamela azüoktettsüiba temzüng-ozüng ka lir aser aji, ‘Tsüingrem O’ laishiba nung zülua aliba ozüngtem ya lir. Atangji alima nung temzüng-ozüng tesashi agi malentetba aser mazüoktetba aika Tsüingrem-er ozüng laishiba nung zülua akaba ‘O’ agibo melamela alentetba aser azüoktetba aika ajangshia aruogo.
Alima nung tashitemeteter, tulur, takar aser oda chuba menden nung amener aikati kodang ‘TSÜINGREM’ ta sudir ajibo adendena tsüibur. Anungji alima akoktsüi aser azüoktsüi atema temzüng-ozüng tesashi dang nungibo Tsüingrem ‘O’ agi azüoktsüi temelaba asütsüi ta bilemer. Aji oda, nisung ajak tangatetba kasa masüji karibo asenok ajak kidang laishiba yua lirji ‘Ao milen’ aser ‘Tir Yimyim’ nung laishiba o nungi ocet zülutsüi nungdak mali ta ashitsüi akok…! Mesura ano kibong shia kidang laishiba lirji tenla kidang Bodhbar, Honibar aser Deobar sentep shia pulpit nung Tsüingrem o sayutsüingitsüi nungdak mali ta-ka ashitsüi akok…! Ajisuaka, tanu asen lima aser loktiliba majungba ya kibong shia nung laishiba kar sernung, iba laishibaji mazüngba, mebushiba aser laishibai melaba ama melitetba ajanga majunger. Laishibaji kidang ayuba jagi teperi masü, saka azüngtsüila, bushitsüila aser laishiba nungi kati ka ajungshiteptsüila, kechiyong asen Aor balaka joko kibong shia kidang laishiba yur küm noklang ka ser tenem jungdi asür, saka ano laishibai sayuba amai melitetba Khristan tamanger aika lir.
Anungji tamanger shia anogo aben Tsüingrem o agi kati ka ajungshitepa aser kati ka metongshitepa alitsüi kangasa nungdaker. Aji agi osang kaket ajak nung Tsüingrem o lemsatepdak tapak aser tawa tila kabosa wazüka toktsüir sudi ta rajemer. Osang kakettem nung ocet balala züluba agi tazünger ajakbo kasasa tajangzük mangutsüi akok, kechiyong shi-ango asüyongjia kari temo chinur, kari tetsüi chinur aser karibo teret dang mejaknur ta lir, saka jangra-pangraa azünger kar danga temoatsüi ngura aji teperi. Atangji kari oshi-oben teratet indang ocet züngnur, kari sobaliba indang ocet züngnur, kari alima politics indang ocet züngnur, ano karibo Tsüingrem ‘O’ nungi züluba ocet züngnur ta lir. Aji oda, osang kaket nung laishiba ‘O’ nungi ocet zülutsüi menungdaker ta kari bilemra, ajibo melenshi nung ajungtsüi asü ? Hoi…Aotsüir Aor tashitemeteter, kenshi-oshir, lennir tajungtem asenoki asen sasa aseni tang ajak metet ama bilema lira aji endokdi, aser tangar-a züngshia tulur-tilar/tashir-mashir ajak den liromedema alitsüi meranglaba…Tsüingrem o-i ashir, “Kechiyong tim bilemba dang nungi pei indang tali ulua tebilem” (Rom-12:3). Tsüingremi iba o ajanga tazüngertem moatsüitsüi imlar.