Nagaland nung Rotavirus vaccine agütsür

Dimapur, August 2 (TYO): August 2, 2019 nü Naga Hospital Authority Kohima nung MD, NHAK, Dr. Thorhusie Katiry-i tanur ka nem RV vaccine indang mezüngbuba dose agüja Rota Virus Vaccine agütsüba mapa tenzüktsü.
India nung Rotavirus ajanga arishi küm 5 teküpok tanur 40% dak poksen timtem adokdaktsür. Rotavirus diarrhea ajanga küm nung tanur 32,70,000-i mozü bushia anepalur, 8,72,000 tashi mozü kidang anioker anepalur aser tanur 78,000 asür, ta Kartiry-i ashi.
Sorkari poksen aoba azüoktsü atema mapa aika inyaker aser iba nung Rotavirus vaccine tenzükba ya ka lir. Rotavirus vaccine ajanga dang Rotavirus diarrhea nungi kümzüker, ta paisa ashi.
Sentong nung SIO, DHFW, Dr. Ritu Thurr-ia ashiba agi, vaccine ji Routine Immunization Programme nung tenzüktsü aser hopta 6, 10 aser 14 nung Penta-1, 2 & 3 vaccine den külemi Rotavirus vaccine drops 5 agütsütsü.
Rotavirus vaccine ya tanga immunization vaccines ama angati dang agütsütsü. Anungji, tsüraburtem aser teloktemi iba maongka agia, tanurtem nem mozü jemdaktsütsü ayongzüker, Dr. Ritu-isa ashi.
Tanü IMDH, Mokokchung nunga Dy. CMO Dr. Kibangkumba-i mezüng mozü jemdakja Rotavirus vaccine (RVV) agütsüba mapa tenzükogo.