Independent nungi adoksang Tongpang Ozüküm yakta NDPP nung adentsü

Mokokchung, Aug 2 (TYO): Yakta Nationalist Democratic Progressive Party (NDPP) nung adentsü aser iba party den lungjemer aotsü aser nüburtem asoshi PDA sorkar tashi idaktsütsü, ta 24 Angetyongpang Assembly Constituency nungi Independent nung adoksang Nagaland Housing and Mechanical Minister, Tongpang Ozükümi NDPP nung adentsü asoshi sangdongogo.
Pai iba o ya Aug 2 nü NDPP Mokokchung region pur parnok kimen kidang Tsüngremmung amungba sentong ka nung jembidang metetdaktsü.
Tawa MP Election agiba mapang Mokokchung district nung PDA sorkar nung adener party ajaki meranga inyaker takok tajung ngutsüba asoshi pai pelaba lemsatepa liasü.
Nagaland Chief Minister, Neiphiu Rio ya temoatsü aliba nübu ka lir, aser pa dak lenisütsü sempet tajung keta lir, anungji, pa lenisüba nung tang aliba sorkar yagi nüburi aginüba ama aser alima ajungtsü asoshi inyaktettsü teimla tulu lir, ta paisa shisem.
NDPP ya tawa ang tenzük asünung, timtem karbo ajurutsü akok, saka timtem arema tila kümer iba party ya tashi ita kümdaktsütsü asoshi ajaki meranga inyaktsü, paisa ayongzük.
“Ni yakta NDPP nung adentsü bilemdar aser iba party den lungjemer aotsü aser tang aliba PDA sorkar ya tashi ita kümdaktsütsü”, ta pai tejangraba o ka ashi.
Pa NDPP nungi mesüaka, NDPP puri pa bilemteta jaokba asoshia pelaba olen ka lemsatep. Tanü aluyimer kangabo mali, aji süaka, pei kechi wadang nung noktaka lir, item ajak nungji Tsüngremi moajang, ta paisa moaja ashi.
Iba sentong nung RD Minister Metsübo Jamir, NDPP Mkg Region Tir N. Bendang Jamir, NDPP Mkg Region Vice President L.Yanger, NDPP Mkg Region General Secretary (Admin) S. Bendang Aier, NDPP Women Org. Vice President Akala aser NDPP central nungi ketdangsür kar densema parnokia shilem balala agia liasü. NDPP Mkg Region Women Org.-i ken tajung ka tena telok lemsadaktsü.