India nung Iraq akümer asü ?

British yimli nungi India nüchiso angudang Jammu & Kashmir lima ya India telongjem kübok mali asü saka India nüchiso ngur külen 1947 küm October ita nung dang, Jammu & Kashmir lima nung chuba Maharaja Hari Singh-i India kübok jenjang balaka nung state ka ama alitsü asoshi mulunga sign sütep. Ibayongji, India temzüng arla 370 nung iba state yabo temzüng dena balaka alitsü asoshi temeten agütsür taoba küm 72 yimsüsüa aruogo. Atangji, tetenzük dang nungi India asoshi Jammu & Kashmir state ya nükenbelemdaktsüba state ka liasü. Tang tashi Kashmir lima ya tesadangka Pakistan aser tesadangka India kübok ta lemdanger alir aser Jammu & Kashmir nung aliba Muslim nungertemibo Pakistan lenang tejak tashiba amato aiben sayur. Ibaji tamangba yimsü tsütsü nungi adokba tebilemtsü lir. Joko. India kübok aliba Jammu & Kashmir-bo India telongjem kübok jenjang balaka nung alitsübajibo yutsür state-tem rongnunga mezüngsemtsüsa ana küma lemdanger Union Territory jenjang nung yutsüogo. India nüchiso ngur tang tashi nung state teimba teimba küma aoba otsü dak alaka state ishinba akümba otsübo tang mezüng ataloker asütsü. Atangji, BJP asoshi ibai ajungbena ka miima inyakba ka masü saka election mapang nangzükba o mapa küma inyaker. India nung state aser union territory akümba mapa ya tang mezüng masü saka tang tesüsa akümba state-tem rongnunga Chhatisgarh, Uttarakhand aser Jharkhand ama state tasen küma aoba nguogo. Ajisüaka, item state-tem akümdang yabo tang Jammu & Kashmir nung atalokba amabo matalok. Item state-tem yabo tanga state tulu kübok liasüba nungi jenjang tajung kati ajungkettsüba mapa ka liasü. Ajisüaka, tang Jammu & Kashmir dak inyakba yabo yimten jenjang tilaba ka kübok ayutsü asoshi tashiyim agi amakba mapa ka amato kümogo. Kecha südanga state mesüra union territory tasen ka akümtsü asüdang, tang Jammu & Kashmir nung inyakba ama, jelia tongpang tului yoker amato sepai meyirijang ana asem tashi yoka malitsü südi. Kecha südanga state aser union territory tasen akümtsü asüdang, yangji alir yimten yimsüsürtem pei kidang nungi kimai maludaktsüi shibanga yur tatar senden nung telemtetba agiabo malitsü südi. Ibai tesüngmangtsü aser shisabolutsüka lir. 1947 küm tangatettep nung Jammu & Kashmir India telongjem kübok adenba agia temulung masü aser magizüktet, tang tashi India nükenbelemdakja arur. Atangji, Ladakh nung alir Tibetan nungertem asoshi otsü balaka alitsüa akok. Parnokbo Jammu & Kashmir kübok aliba dang nungi tang union territory balaka kümer lia aobajiang tajungba asütsüa akok. Parnok asoshibo parnoki meshiba angur asütsü. Iba amaji Jammu & Kashmir nung alirtemia temelenshi aginüa alitsüa akok, anungji tanga state aser union territory tasen akümdang amato nisungtem rongnung tetsübu aser tarendak melii ajaki pelashishisa agizüktettsüsa nübortemi mulungba nung shisatsü tesadem agi ken o lemteptsüla. Tangbo India tatar senden nung BJP agi tua lir, anungji kechi lemtetnüdir lemtettsü akokba mapang ka nung parnoki yimsü asür. Ajisüaka, kechi telemtetba südir süaka nisungtem ola madokdaktsü aser marakzüdaktsü shibanga yur tatar senden nung lemtetbajibo tarutsü putui melenshitsüsa adoktsü. Ashiko, tangbo Jammu & Kashmir temzüng balaka ser yimsüsüa aliba jenjang agientsüba agi Delhi nungbo pelatepdar asütsüa akok, saka iba tepela jagi Jammu & Kashmir ya India nung Iraq lima ama küma ora, ano tamalen dang nungibo tang aser tarutsü mapang nungsa timtem lendong tajuruba asütsü. Yimten nung kechi telemtetba agidir, lisopurtem maksüja mesüra mezüngmeshia masü saka züngshia aser akümtsübu agüja lemtettsüla. Kashmir nung tang yimsü tesüdak purtem rongnung Farooq Abdullah, Omar Abdullah aser Mehbooba Mufti  nungertem ama kidang shibanga yur Jammu & Kashmir yimten jenjang latetbaji India asoshi tebilemtsü akoker masü saka tebilemtsü tuluba akümer asütsü.