Jaishankar-i US ketdangser Zalmay den Afghanistan tensa atema jembi

New Delhi, August 07 (Agencies): Union Minister of External Affairs, S Jaishankar-i US special officer on Afghanistan, Zalmay Khalilzad ajurua tenati Afghanistan tensa atema o lemtepogo.
EAM-i tweet ka ajanga, linük anapronglai iba onük nung longjemer inyaktsü atema tebilemba lemsatepa liasü, ta metetdaktsü.
2019 küm tang agi asembenbuba Khalilzad-i India semdanger.
Jaishankar-i twitter ajanga, “US Special Representative Zalmay Khalilzad den tajangzük kaa o lemtepogo. Pai Afghanistan tensa indang osang metetdaktsü. Iba onük atema linük ana longjemer inyaktettsü lenmang balala indang lemsatep,” ta metetdaktsü.
Doha nung Taliban den tang agi tibenbuba ken o jembiba sülen Doha nungi Zalmay, Delhi-i indangindanga aru.
US sepaitemi South Asia linük Afghanistan toktsür aotsü atema kobi melii tezüngzüktep ka agitsüa akok. Taliban teloki iba tezüngzüktepji Eid benjung mapang nung aginer. Iba benjung ya August 11 nungi August 14 tashi amongtsü.
Delhi toktsür par linüki aotsü lia Zalmay-i twitter ajanga, “Ozü team aser Taliban züngsemtemi maneni technical tsütsü onüktem nung o lemteptsü aser ni shimba sülen inyaka aruba shilem pezü tezüngzüktep takok ngua inyaktsü atema mera agia inyaktsü. Item lenla nung tezüngzüktep agitsüji kanga tongtibang,” ta metetdaktsü.
India-i Afghan nung yimjung atema pusemer aser iba atemaji India-i Iran, Russia, China aser Central Asia linüktem dena jembia inyakdar.