Sushma Swaraj-i timtem nung alir senso ajak yari: Sonia Gandhi

New Delhi, August 07 (Agencies): Bodhbarnü Congress lenir aser UPA Chairperson, Sonia Gandhi-i, taoba mapang External Affairs Minister, Sushma Swaraj-i India nunger diplomacy jenjang yanglutsü, ta metetdaktsü.
Sushma asüba atema la kinüngbu Swaraj Kaushal den mangyim lemsatepa Sonia Gandhi-i shidi ka ajanga, “Nü kinüngtsü, Sushma Swaraj ajungbena asüba osang angashia aoksar aser jashir,” ta lemsatep.
Sonia Gandhi-isa, “Sushma Swaraj ya sempet balaka aliba tetsür ka liasü, la dak tasütait tanela aser temelungtetba tulu liasü. Lai menden balala ajak nung kanga nendaka inyakogo. Item ajak dak alia la dak tepuatsü sempet aliba ajanga nübur tenzükba mapa aser yimtenren nung lai jangratema inyakogo. Lai la ajurutsü atema tongmelang nisungtem nema maongka agütsü, lai nübur tapu balala ajak den tesendaktep tajung ayu; la dak temeim aser aria bilemaba melungsentsü liasü. Lai timtem nung alir India senso ajunga yariba ajanga lai India nunger diplomacy nung jenjang tajung ka yanglutsüogo,” ta ashi.
Sonia-isa, Sushma Swaraj ya o tsüngro-songo jembir ka liasü, MP tajung ka aser la dak tembar temeimtep aliba ajanga yimtenren nung aikati la nükshia liasü, ta ashi.
INCIndia-ia tweet ka ajanga, Chairperson Congress Parliamentary Party, Sonia Gandhi-i Sushma Swaraj ajungbena asüba atema Kaushal den mangyim jashi lemsatepogo, ta metetdaktsü.
Sonia-isa, “Lok Sabha nung küm aika külemi tenzüka arudang küna tsüngda tesendaktep yanglu, aser la asüba ajanga ni jashir. Lai anojungi asenok toktsür, kechiyong lai linük atema ano aika inyaktettsüsa liasü, ibayongji la asüba ya tesasatsüka lir,” ta ashi.
“Iba ama mangyim mapang nung ni na aser ner jala Bansuri den mangyim lemsateper aser sarasademtsür. Tsüngremi nenok nem tashi tasen agüjangma. Sushma-i taküm akhüm keta litetogo, lai linük atema aika inyaktsüogo aser India nunger ajaki la nükshi, ibaji asadanga na melung süngzüktsüla,” ta laisa lemsatep.