Diego Forlan asaya nungi anener

Luroi/August 7, 2019 (Agencies): Taoba Uruguay nunger striker Diego Forlan-i pa football asaya nungi anenba metetdaktsüogo, aser iba ajanga pa continent asem nung küm 21 asayaa aruba tatembang ka dangi aniogo.
Forlan, shiba South America nung Argentina nung club Independiente nungi asayaa tenzük, pa Manchester United, Villarreal, Atletico Madrid aser Inter Milan nungi asayaogo aser iba sülen Asia nunga asayaa aliba mapang asaya nungi anenogo.
Arishi küm 40 tain Forlan-i Uruguay team 2010 World Cup semi-finals tonga asayaba nung tongtibang shilem agiogo aser iba asayamung nung pa nem Golden Ball award agüja liasü aser asayamung nung goal timtiba agütsürtem rongnung densema liasü.
“Küm 21 sülen ni asaya nungi anentsü aoshi telemtetba agiogo,” ta Forlan-i ashi.
“Taküm nung jangrademtsü mapang ka tembangogo saka ano tajangshiba balala ajangshia aotsü anunga lir. Kü lenmang nung ni nongita yarirtem ajak dang kanga pelaba lemsateper,” ta paisa ashi.
Forlan-i, United nungi asayaba mapang Premier League aser FA Cup kokogo aser iba sülen Spain nung oa Atletico nungi asaya aser iba mapang 2010 küm Europa League koka liasü.
Kasa mapang nung pa lenisüba kübok Uruguay team-i 2011 küm Copa America koka liasü. Parnoki final nung Paraguay 3-0 agi akokba asaya nung pai goal ana tashi idakja liasü.
2016 küm Indian Super League nung Mumbai City nungi asayaba sülen pa Hong Kong Premier League nung Kitchee Sports Club nungi asayaa liasü. Pai linük aser club asoshi goal 250 dak tema idaktsüogo.