T20 World Cup Qualifier atema Nigeria-i Zimbabwe melenogo

Luroi/August 7, 2019 (Agencies): Tebur T20 World Cup Qualifier atema tatembangbuba spot asoshi Zimbabwe melena Nigeria shimogo. Tawa ketdangsüba tsütsü timtema adoka ICC-i tenokdangba agütsüba sülen Zimbabwe iba asayamung nung shilem magitettsüsa akümer. Qualifiers ya UAE nung October ita asayatsü renema lir.
Nigeria, shirnok Africa Men’s Qualifier nung temaba jenjang asembuba nung tembanga liasü parnok Kenya aser Namibia na den qualifier nung shilem agitsü. Tebur Qualifier nung Africa nungi linük asem den UAE, Hong Kong, Ireland, Jersey, Netherlands, Oman, Papua New Guinea, Scotland, Singapore aser America nung Final asayaba sülen linük ana ta shilem agitsü.
Parnok rongnungi team tajungtiba trok 2020 Men’s T20 World Cup nung asayatsü, koba taruba küm October-November nung Australia nung asayatsü.
Iba inyakyim nungi Zimbabwe aginba sülen Associate nation nungi linük kabosa iba asayamung nung shilem agitsü maongka angutsü. Qualifier sülen team 6 ya October ita Bangladesh aser Sri Lanka dena asayashitsü aser group shia nungi temaba team ana main draw nung densemtsü.
ICC T20I rankings table nung temaba jenjang nung aliba team ti Super 12s atema qualify süogo.
Kasa mapang nung ICC Women’s T20 World Cup nung asayatsü asoshi tang mezüngbuba Namibia nem maongka agütsüogo, koba Australia nung taruba küm asayatsü. Zimbabwe nung timtem aliba ajangsa parnok iba maongka ngua liasü. African Qualifiers nung parnok Zimbabwe sülen tanabuba jenjang nung tembanga liasü.
Iba dak sendakba nung Zimbabwe nunger cricket asayar Sikandar Raza-i international cricket governing body aitsüogo aser shiba agi, iba jenjang aginba dak sendakba nugn tashitsü kecha melei akümer. ICC aija Raja-i yamai tweet asü; “ICC telemtetba angazüka tashi kecha melei akümer. Ano osang kar danga lir akaa melei metetdakjang, aji asünungdang onok mapa manguba taküm ka ama sentong tera tajungba yanglutsü.”