NPF-i Naga yimten latettsü atema inyaker; PDA-i mashilen inyaker

Kohima, August 7 (TYO): NPF-i Indo-Naga yimjung maparen tekaratiba nung angatetteptsü atema kanga meranga inyaka aru aser Framework Agreement agitep saka NDPP-i aniba PDA sorkaribo mashilen inyaker ta taoba Chief Minister aser NPF Legislature Party leader T R Zeliang-i ashi.
Tanü NPF Central Executive Council senden nung jembidang “2015 küm State Assembly nung opposition melii NPF sorkari Legislators Forum on Naga political issue tentet” ta TR Zeliang-i ashi.
Iba Forum-i Delhi nung oa Central lennirtem dang Naga nunger taginübatem metetdaktsü aser July 2015 nung Naga nunger lokti balala den senden ka amen. Iba sülen August 3, 2015 nü India sorkar aser NSCN(IM) tsüngda Framework Agreement sign sütep. Iba ya NPF sorkari inyaktetba mapa tulu ka liasü, ta paisa ashi.
Ajisüaka, PDA sorkari Naga nunger taginüba ama masü saka Register of Indigenous Inhabitants of Nagaland (RIIN) mapa inyaktsü atema telemtetba agi. Naga Students’ Federation (NSF)-i taoba NPF sorkar nem memorandum ka agütsüba nung ajemdaker 2017 küm Sentiyanger Commission tentet. Dimapur nung ILP benoktsü atema iba telok shim aser iba nung Dimapur Deputy Commissioner aser Police Commissioner na dena liasü, ta paisa metetdaktsü.
State general election agitsü lia commission-i report agütsü aser iba jagi mapa meinyaktet. Sentiyanger commission-i report agütsüba nung Assam den arrtsü mangatettep dak alaka ajak dena lir, anungji tang state sorkari commission tanga ka tentettsü nüngdak madoker, ta TR Zeliang-isa ashi.
ILP ya Bengal Eastern Frontier Regulation of 1873 ajanga Nagaland-i bener aru aser iba ya küm 146 tain lir aser PDA sorkar indang RIIN den tesentaktep kecha mali. NPF-i dang masü aka Naga nunger ajaki yimten latettsü ta imlaa aliba mapang ka nung PDA sorkari RIIN bener aru aser iba ya Naga nunger anema lir, ta paisa tai tongloktsü.
RIIN ajanga Naga nunger tali ratadaktsütsü kechiyong Naga nunger state aser linük balala nung tashiyim agi lemsar lidaktsüba magizüker, ta TR Zeliang-i ashi.
TR Zeliang-isa NPF züngsemtem ayongzüka olen ka ashidang “asenoki (NPF) sorkar akümtsüla ta bilemra, party takok angutsü atema inyakang” ta ashi.
Nagaland nung NPF-i parliamentary election nung tamakok angubaji tanga party-i masü saka asen party lennirtemi tamakok ngudaktsüba lir. NPF MLA 7-i tangar yari, ta paisa shisem.
“Parnok shi nungbo NDPP den alitsü akok saka parnok tanülabo asenok den lir. Parnoki NDPP nung adentsü merangaka, Tenth Schedule kübok parnok Assembly nungi disqualify asütsü. Par tenetji tenük tapok koya tenet amato lir aser tarutsü nung parnok meyipa arur party tashi itshishitsü atema longjemer inyaktsü imlar” ta TR Zeliang-isa metetdaktsü.