Northeast nung project aika metembang lir

Dimapur, Augsut 7 (TYO): August 7, 2019 nü DoNER Secretary, Inderjit Singh-i Kohima nung Chief Secretary, Temjen Toy aser AHoDs o HoDs den senden ka amen.
DoNER teloki August 8 nü Kohima aser Dimapur nung project balala reprangdanga senzütsü.
Tanü Inderjit Singh-i ashiba agi, “India sorkari ‘DoNER AT YOUR DOOR STEPS’ indang policy tenzüka lir.”
“Nenoki Delhi-i arutsü melena, onok nenok dangi sensaksemi arutsü, nenok khurettem metettsü, tebilembatem angadangtsü aser Centre sorkar aser DoNER-i Northeast state tem atema kechi inyaktsü ta asüba angatettsü” ta Inderjit-isa metetdaktsü.
India sorkari teti North East nem teyari balaka agütsür aser ibaji 90:10 tangatetba nung Central aser state shares lir. Tanga state tem nungbo 60:40 ratio lir saka North East kübok mapatong aika nung 90:10 ratio nung inyaker, ta paisa shisem.
North East state 8 nung onoki küm 2 nungi 3 tsüngda mapatongtem tembangtsü imlar saka mapa kanga meilongi inyaker. North East state tem nung tang Rs. 20,000 crore shi ka indang projects 13013 inyakba nung, 24 bo küm 15 dak tema inyaka arur. Ano, küm 10 nungi 15 tsüngda inyakba project 110 lir aser itemji Rs. 2000 crore alang lir. Project ka iba amai menua inyaktsü asoshi tatemtsü kecha mali, ta DoNER Secretary-isa metetdaktsü.
Iba senden nung mendenji Chief Secretary, Temjen Toy liasü aser Additional Chief Secretary, Sentiyanger Imchen-i powerpoint presentation ka sayu.