Taoba Congress MP Bhubaneswar Kalita-i BJP nung denogo

Guwahati, August 9 (Agencies): Taoba Assam nungi Rajya Sabha MP Bhubaneswar Kalita-i tanü Bharatiya Janata Party (BJP) nung denogo.
August 5 nü pai Rajya Sabha nungi anen. Jammu & Kashmir nungi Arrla 370 agienba anema Congress-i noktakba atema Kalita-i RS nungi anena liasü.
“Prime Minister Narendra Modi aser Union Home Minister Amit Shah na lenisüba kübok linük tejakleni aoer aser tashitaitba akümer” ta pai ashi.
“Ni Congress nung aliba agi BJP sorkari Arrla 370 indang onük benokba posema menungittet. Anungji ni Rajya Sabha aser Congress nungi anentsü telemtetba agi. Linük renlokba maparen nung ni dennür” ta taoba mapang Kalita-i shia liasü.
“Kashmir onük atema Congress-i kü dang whip ka agütsütsü ashi, saka ochibaji linük khenyongi melenshiogo aser iba whip ji linük nung alirtem tangatetba anema lir. Congress-i iba tangatetba ajanga pei sasa sosettsü meranger ama lir aser ni iba nung shilem maginür. Ni whip sülen manidaktsü aser anentsü. Tanü Congress lenisüba yagi Congress samatsütsü meranger. Party raksa aobaji shingaia manendaktsütsü” ta Kalita-isa shia liasü.
Hokolbarnü New Delhi nung aliba BJP headquarters nung Kalita-i Union minister Piyush Goyal aser tanga tongti lennirtem lia BJP nung züngsem aküm.