Kerala nung nisung 22 süogo; Army aser IAF teyari meshir

New Delhi, Luroi/August 09 (Agencies): Tzünglu kanga sashia aruba ajanga Kerala tesem aika kanga mejungi kongshiogo aser nisung 22 asüba den külemi nisung 22,000 dak tema relief centres nung jenoka lir.
Tzümetsüng agi state kübok districts teku mejungi kongshiogo aser tzümetsüng agi tamajungtiba kongshibaji Wayanad, Malappuram, Kannur aser Idukki lir.
State sorkari state nung kümzükba maparen inyaktsü atema Army aser Air Force yoktsü mepishia liasü. Wayanad nungi Lok Sabha MP aser Congress lenir, Rahul Gandhi-ia Ato kilonser dang state atema teyari meshiogo.
Wayanad nung nisung 9,951 tashi shelter camp 105 nung jenoka lir aser Malappuram nung nisung 4,106 shi shelter camp 26 nung jenoka lir.
Hokolbarnü Wayanad district kübok Meppadi nung anentsüh sashia aluba lendong nung nisung aika samaogo. Iba anentsüh ajanga Hindu nunger tekülem ki ka, mosque ka, ki ishika aser gari kar anenbang, ta osang angazüker.
Iba tensa asadangtsü atema tanep Chief Minister, Pinarayi Vijayan-i senden ka ayongzüka amenba sülen pai osangbenertem dang, tesüiba anogo asem tsüngda tzünglu ajanga nisung 22 süogo, ta metetdaktsü.
Anentsühji tesem 24 nung alu, ta CM-isa metetdaktsü.
Tang NDRF, Police, Fire force aser Forest officials-i kümzükba maparen inyakdar aser sorkari Indian Air Force dang nungia teyari meshiogo, ta CM-isa ashi.
Kümzükba maparen nung yariteptsü atema NDRF team 13 aser Army ketdangser 180 shi state dangi yokogo. District ajak nung Honibar tashi schools aser professional colleges shibangtsü sorkari tuyuogo.
Kerala Public Service Commission densema state nung aliba Universities balala nung Honibarnü agitsü aliba tatidang atsülangogo, ta ketdangsertemi metetdaktsü.