Tir Kovind, PM Modi aser Rahul nungeri Eid salem lemsatep

New Delhi, August 12 (Agencies): Hombarnü linük Tir, Ram Nath Kovind, Ato kilonser, Narendra Modi, tatong Tir, M Venkaiah Naidu aser Congress lenir, Rahul Gandhi nungeri linük sensotem den Eid al-Adha benjung salem lemsatep.
Tir Kovind-i twitter ajanga, “Sensotem den, talisa India aser bendanglen Muslim nunger adianu aser aianutsürtem den Eid Mubarak salem lemsateper. Idu’I Zuha ajanga temeim, telongjem aser meimchirtem tenzükba temaitsü sayur. Item sobaliba yimya tajungtem asenoki benshidi,” ta lemsatep.
Ato kilonser, Modi-i, “Eid al-Adha benjungmong nung ni salem lemsateper. Iba ya ajanga asen lokti nung tesünep aser tepela alitsü ni imlar,” ta lemsatep.
Linük tatong Tir, Naidu-i twitter ajanga, “‘Id-ul-Zuha’ benjungmong nung ni linük sensotem den salem lemsateper. Iba benjung ya tekülem, tamang, tenla agütsüba benjung lir, aser iba ya ajanga adianu temeimtep, aria bilemba aser telongjem alitsü atema ajungmesor,” ta metetdaktsü.
Paisa, “Id-ul-Zuha tangatetbatem ajanga asen taküm nung tesünep aser telongjem lidaktsüba den asen linük nung azükaru bener arutsütsü,” ta paisa lemsatep.
Congress lenir, Rahul Gandhi-i, “Asen adianu aser aianutsür ajak den Eid Mubarak lemsateper. Iba benjungmong ajanga nenok nem tesünep, azükaru aser tepela bener arujang ta sarasademtsür,” ta lemsatep.
Defence Minister, Rajnath Singh-ia twitter ajanga, “Eid al-Adha salem lemsateper. Iba anogomong ajanga asen lokti nung tesünep aser telongjem tashi itdakjang,” ta lemsatep.
Eid benjung ya Islam lunar calendar nung Dhu al-Hijjah anogo 10buba lir, ajisüaka Hombarnü mongogo. Bakra Eid mesüra Bakrid ta ajaba benjung ya Muslim nungeri Allah dang temeim sayua shiruru tenla agütsüba benjung lir.
Ibrahim (Abraham)-i Tsüngrem tashi anga par jabaso tenla agütsütsü melungtetba nung ajemdaker iba anogomong nung Muslim nungeri san mesüra napong alia tsüngrem nem tenla agütsür.