J&K ya Hindu state asübo Arrla 370 magienla: P Chidambaram

New Delhi, August 12 (Agencies): Congress lenir aser taoba mapang Union Minitser, P Chidambaram-i, Jammu & Kashmir ya Hindu nütsüng timba aliba state asübo BJP-i Arrla 370 magienla, ta aitsü.
BJP sorkari tashiyim amshia J&K nung iba Arrla agien, ta shia Chidambaram-i, tang Jammu & Kashmir tensa mesüngjem aser India nunger media-i masü saka International news agencies-i dang osang bendener, ta ashi.
Tanü lokti sentong ka nung pai, “Parnoki (BJP) Kashmir tensa süngjemogo ta ashir. Ibaji shidak asü? J&K nung India nunger media nokdangra tensa süngjema alitsü asü?,” ta asüngdang.
State tenet nung regional party teneti tetsübu ajanga Rajya Sabha nung iba onük nung BJP anema menokdak, ta pai ashi.
“Lok Sabha nungbo onok majority lir, ajisüaka party tenet (AIADMK, YSRCP, TRS, BJD, AAP, TMC, JDU)-i parnok pusem. Rajya Sabha nung opposition majority süla. Iba ya tejashitsüka lir,” ta pai ashi. “J&K kübok Soura nung nisung 10,000 shii longkak aitba, police-i longkak aiter anema inyakba aser injang khadokba osangtemji shidak lir,” ta pai ashi.
Chidambaram-isa, India nunger küm 70 putiotsü nung state agi Union Territory kümtsüba otsü mali, saka UT agia ang state jenjangi ajungkettsü, ta ashi.