Gautam Roy ajanga BJP tashi aittsü: Laskar Assam Congress tashi itshitsü: Bora

Silchar/Guwahati, August 12 (Agencies): Taoba Congress MLA Gautam Roy-i BJP nung adenba ajanga party tashi aiitsü ta Assam Assembly Deputy Speaker Aminul Haque Laskar-i ashi.
“Congress party azülaogo ta aser iba nung adenba ajanga nübortem metenzüktettsü Roy-i angatet” ta Laskar-i ashi.
Roy ya tashitait lennir ka lir aser pa adenba ajanga BJP tashi aittsü. Congress kanga mejungi raksaogo, ta paisa shisem.
“Congress sorkar mapangbo lennirtem chuba ama liasü saka BJP nungbo yamaji masü. BJP nungbo chuba mesüra yimsüsür shinga mali aser züngsem shiaji sepai ka ka lir,” ta Laskar-isa metetdaktsü.
Roy-i BJP nung adenba ajanga 2021 assembly elections nung BJP-i Hailakandi nungi menden asemprongla nung takok angutsü. Tang Congress party lennirtemi BJP nung adenba ajanga tarutsü nung Congress len anitsüpur shinga malitsü, ta paisa ashi.
“Indian National Congress ta ser political party ka liasü ta asüba ya nübortem amadoktsü” ta Laskar-isa shisem.
Bhubaneswar Kalita aser Sanjay Singh nati Congress toktsüba atema shisa mebulur ta Assam Congress president Ripun Bora-i ashi.
“Taoba mapang Bhubaneswar Kalita dang nungi tejenba lennirtemi Congress toktsüogo, saka iba atema Congress-i kodanga timtem majuru. Congress lennir tejentemi party toktsüba ajanga lanurtemi sabang angur aser party tali tashi itdaktsür,” ta Bora-isa ashi.
Taoba Congress lennir aser Rajya Sabha MP Bhubaneswar Kalita-i party toktsüba atema olen ka ashidang “parnoki Congress nungi anen saka BJP nung adentsü atema parnok sülen anidakertem anir moutet. Congress tangatetba sülen manidakertemi BJP nung adentsü akok, saka chichiba Congress züngsemtemibo Congress kodanga metoktsütsü” ta Bora-i metetdaktsü.
Congress ya India nung party tejentiba lir aser mapang balala nung timtem aika ajuruogo, saka item ajak nung tashitaitba küma noktaktet, ta paisa shisem.