U’khand, J&K nung anentsüh lendong nung nisung 9 asü

New Delhi, August 12 (Agencies): Uttarakhand aser Jammu nung tzünglu sashia aruba ajanga anentsüh alua item lendong nung nisung teku asü; ano külen tzümetsüng agi kongshiba state tem- Kerala, Karnataka, Maharashtra aser Gujarat nunga maneni kümzükba maparen inyakdar aser item state pezü nung asür ajak agi nisung 173 jungogo, ta ketdangsertemi metetdaktsü.
Tanep Uttarakhand nung Chamoli district kübok yimtsüng asem tashi nung anentsüh aluba lendong nung kinü tanur ka den tetsü densema nisung trok tashi süogo.
Jammu & Kashmir nunga tzünglu ajanga Resai district nung anentsüh lendong nung tenemlen nungi long tulu alua kibong ka nungi züngsem asem nenseta asü.
Tzümetsüng agi kongshiba state tem tesem aika nung tzünglu aruba ajema kümdar; item state nung nisung lakh 12 dak tema timtemdar, ta ketdangsertemi metetdaktsü.
Tzümetsüng lendong nung Hombar tashi nung Kerala nung nisung 76 süogo aser Karnataka, Gujarat, Maharashtra state tem nung nisung 97 süogo.
Gujarat kübok Kutch district nung gari lenmang nung tzü agi ponger aoba nisung 125 shi Indian Air Force (IAF)-i kümzükogo aser Karnataka o Maharashtra states nung gari lenmang yanglushiba maparen tenzükogo.
Tanü Congress Party lenir, Rahul Gandhi-i Kerala kübok par constituency- Wayanad Lok Sabha constituency nung Puthumala densema tzümetsüng agi kongshiba tesemtem semdangba sülen takoksa angur ajak yaritsü, ta nangzükogo.
National Disaster Response Force (NDRF) teams den Indian Air Force (IAF), state disaster response forces aser local administration-i tzümetsüng aliba state tem nung relief agütsüba den kümzükba maparen maneni inyakdar.
Tanü linük yimtiba, Delhi nung minimum temperature 28 degrees Celsius liasü aser anepdang 8:30 ako meta ‘humidity’ 84% liasü.