Imphal airport nung Rohingya nunger 6 apu

Imphal, August 12 (Agencies): Manipur police-i Rohingya nunger nisung 6 tashi apu. Parnoki taila kulikakettem bener India telungi aittsü lia Imphal airport nung apu.
Delhi nung aruba Indigo tayimtsü ka nung parnok ya Honibarnep apu.
Indigo tayimtsü ka ajanga ozüng alema arur kar Imphal-i aittsü meranger ta onoki osang tejangja ka angazük. Idangjisa onoki Foreigner Check Post (FCP) ka amenok aser Imphal West district police nem osang sangoktsüba sülen parnoki nisung 6 ji apu, ta Deputy Inspector General (DIG) of Police (Intelligence) Themthing Ngashangva-i ashi.
Parnoki bena aliba Aadhaar card ji taila liasü ta police-i putet.
Par trokji Yarzarlin, Min Min Oo, Soe Ko Ko, Moe Sat Naing, Nyi Nyi Soe aser Zaw Min Than nungertem lir ta jangjaogo.
Parnok trok rongnung asem indang Aadhaar card nung address ji Manipur indang liasü. Tanüngba asem indang address ji Hyderabad nung liasü.
Parnok rongnung nisung katibo Hindi oshi jembiteter aser tanüngba jagi Hindi mesüra Manipuri mejembiteter aser Urdu ang angateter.
Police-isa Hoe Myint Naing indang ATM card ka nung CB Bank Visa aser Myanmarese oshi indang cash memo receipt ka angu.
Parnok dang asüngdangya asüdang parnok Rohingya nungertem ta nangzük aser parnok indang maitsü chichiba metetdaktsü.
Parnoki ozüng alema anir aruba nisungtem (agents) kar shiogo aser parnokji aputsü, ta DIG Themthing Ngashangva-i ashi.