Kumlong Arogo nung Environmental Awareness sentong agi

Mkg, August 12 (TYO): Kumlong Baptist Arogo Christian Education Ministry-i August 12 nü “Creating a free litter zone” omen nung Junior class purtem atema Environmental Awareness sentyong ka ayongzüka agiogo, ta osang ka ajanga metetdaktsü.
Iba sentong nung shisalen sayurji Lecturer, NBC aser Clean Mokokchung Campaign Co-ordinator, Wb. Limaonen Imchen liasü.
Iba awareness sentong ayongzüka agiba nükjidongji plastic densema jana balala agi asenok libajen menentsüba anentsü, jana ajanga asen temang nung timtem agütsüba, tzü menentsüba, chiyungtsü mim kümdaktsüba aser mopung menentsüba mapatem anentsü atema liasü.
Iba dak alia video ajanga sensotemi asen libajen raksatsüba indanga sayu.
Limaonen Imchen-isa senso tajung ka ama asenoki gari lenmang aser kilentzü aodak jana meindoktsü, ajisüaka plactic tanaben recycle süa amshitsü atema lenmang bushitsü, asen libajen merüka ayutsü aser nüburtem den iba indang lemsateptsü atema tesayuba agüja liasü.
Lao Tzu-i jembiba shin o lepshia pai, “Mile meyirjang aika aini aobaji mera ka nungi dang tenzüker” ta shia temelenshiji tilaka nungi dang tenzüker, anungji ajaki nendaka inyaktsüla aser alima wazüka ayuba nung süoki ia shilem agitsüla, ta ashi.
Lipok 1:26 Lai O nung ajemdaker pai, Tsüngremi alima anepalutsü atema meimchirtem nem mapa nungloktsüba indang metetdaktsü.
Kumlong Baptist Arogo nung Deacon, Toshikaba-i shisalen sayur dang pelaba lemsatepba den külemi Arogoi iba sentong ayongzüka katsüba atema pelaba lemsatepba sülen Tsüngrem temoatsü meshia sarasadema liasü.
Iba sentong nung tanur 70 shi aden aser iba sentong nung adenba ajanga parnoki libajen wazüka ayutsü atema dang masü saka pei aliba tesem merükteta ayutsü angazük.
Christian Education Ministry-isa, environmental awareness campaign ya küm piyong agitsü, ta metetdaktsüogo.