SDF MLA 10 BJP nung aden

Gangtok, August 13 (Agencies): Mongulbarnü Sikkim Democratic Front (SDF) nungi MLA 10-i BJP nung denogo.
BJP working president JP Nadda aser General Secretary Ram Madhav na lia parnoki BJP züngsem aküm.
Iba ajanga Sikkim nung züngsem 32 agi akümba Assembly nung taoba chief minister Pawan Kumar Chamling-i aniba SDF MLA 5 dang anünger.
Ano, tanü SDF MLA tem BJP nung adenba ajanga parnok Opposition party tongtiba kümogo. Ajisüaka, Assembly elections nungbo BJP-i menden ka nung dang takok mangu.
Taküm Assembly elections nung Sikkim Krantikari Morcha (SKM)-i menden 17 aser SDF-i menden 15 nung takok ngua liasü.
Tanü BJP nung adenba MLA tem rongnung kümsük punguben tashi MLA inyaker Dorjee Tshering Lepcha dena lir. Pa ya Chamling’er sorkar nung kümsük asemben tashi minister inyak aser pa den ano asemben tashi MLA inyaker Ugen Gyatso dena lir.
Lepcha-i ashiba agi, Narendra Modi’er sorkar indang “look east” policy ajanga pa mulung nung kongshi, kechiyong par state ya China, Bhutan aser Nepal den arrtsüa lir.
“Sikkim nung regional party ka nungi MLA tem telong junga national party nung adenbaji tang mezüng ataloker asütsü. Onoki Sikkim nung lotus (BJP election symbol) pongdaktsünür” ta paisa metetdaktsü.
Pawan Kumar Chamling-i aniba SDF ajanga küm 25 tashi Sikkim nung sorkar yimsüa aru. Iba ajanga pa linük nung mapang talangtiba inyakba chief minister aküm, saka taküm assembly elections nung pai tamakok angu.