Manmohan Singh Rajya Sabha atema nomination file süogo

New Delhi, Luroi/August 13 (Agencies): Taoba Ato Kilonser aser Congress lenir tejen Manmohan Singh-i Mongolbarnü Rajasthan nung Rajya Sabha menden ka atema nomination paper file süogo.
Singh ya taoba mapang Assam nungi Rajya Sabha züngsem ka liasü. Pa nomination paper file asüba mapang Rajasthan Chief Minister Ashok Gehlot, deputy CM Sachin Pilot aser state nung lenir tejentemi miner oa liasü. June ita BJP nungi Madan Lal Saini asüba sülen Rajasthan nung iba menden ya tazüng aküm.
Nomination file asüba sülen osangbenertem den sensaksemba mapang Singh-i, “ni Congress party, CM Ashok Gehlot, deputy CM Sachin Pilot aser house nung tanga züngsemtem dang ni nominate asüba atema kanga pelar. Kasa mapang nung iba menden tazüng akümba tia ya tejashitsüka ta ni angateta lir. Ni Saini’er kinungertem den asükhu lemsateper,” ta ashi.
Rajasthan atema special status akhangba dak sendakba nung pai ashiba agi, “Rajasthan nung aliba nüburtem ajungkettsü atema kechisa takoktsü lir item ajak ni inyaktsü.”
Congress MLA tem dak alia Singh indang nomination ya BSP MLA tem aser Independent MLA timbakati pusemogo shirnok iba sentong nung dena liasü.
Dr Manmohan Singh, 1991 küm Assam nungi Rajya Sabha züngsem ka ama shim aser iba mapang nung Ato Kilonser PV Narasimha Rao-i, rongsenketsüng ajungkettsü nükjidong nung pa indang cabinet nung züngksem. Manmohan Singh, term pezü tashi Rajya Sabha züngsem ka ama inyaka aruogo aser term anabo Linük Ato Kilonser ama inyakogo.
June ita pa indang term tembangba sülen Assam nung Congress pur tashi meite aoba ajanga candidate ka danga file masü. Assam assembly nung züngsem 126 nungi Congress züngsem 25 dang lir.