Girl Child Day sentong Mon nung agiogo

Dimapur, Luroi/August 13 (TYO): August ita atema Girl Child Day, August 10 nü Sacred Heart School, Mon Town nung agiogo. Iba sentong nung shisalen agütsürji Ponglem Konyak liasü, shibai bravery awards aika ngua lir. Lai 1995 küm kanga tasüita ozüng raksar nisung ka den raraba atema la nem 1998 küm January ita 26 nü Nagaland Anghi Bravery Award agüja liasü.
Iba sentong ya Women Welfare Officer, Mahila Shakti Kendra (MSK)/District Level Centre for Women (DLCW), Mon Ngepshom Konyak lenisüba kübok aka. District Coordinator, MSK Olem-i MSK nükjidong tongtibangtiba dak ajemdaker jembi. Kasa mapang nung Sacred Heart School nungi tetsür asem aser tebur asemi pei sasa mulungteter ‘Girl Child Day’ onük nung ajemdaker o jembi aser parnok nem sempet agüja liasü.
Iba sentong ya Beti Bachao Beti Padhao (BBBP) Scheme kübok MSK Mon aser District Administration la longjemer ayongzüka agiogo. District Administration-i achaayanga itashia school balala nung Girl Child Day amungtsü asoshi sentong yanglua lir, ta ketdangser sangdong ka ajanga metetdaktsü.