Longleng DPDB-i LADP agizük

Dimapur, Luroi/August 13, 2019 (TYO): Longleng DC Conference Hall nung August 13, 2019 Mongolbarnü tawa tasen shimba DPDB mendenpuba, B.S Nganlang Phom leniba nung Longleng District Planning & Development Board senden ayongzüka menogo.
Senden nung adenertem ajungshia jembiba mapang, Phom-i ashiba agi, telok tentet koba südir süang, tajangzük alitsü asoshi longjemer inyaktsüji kanga dang nüngdaker aser district nung asalentong maparentem takok ngua inyaka bener aotsü atema züngsem kija shia meranga inyaktsüla, ta ashi.
DPDB züngsem timtem ajunga angadangtsü asoshi renema lir, ta Phom-i nangzüka, pai Department tem nung metokmeperi timtem alibatem bener arutsüla aser maparen süsümedema bener aotsü asoshi DPDB züngsem ajunga dang telongjem tanüla nung inyaktsü asoshi mepishia liasü.
Senden nungsa, S. Pangnyu Phom-i jembiba mapang pai, district nung 2019 Lok Sabha election yimjung nung tembangdaktsüba atema sorkar ketdangser dang pelaba metetdaktsü.
DPDB ya olemteptsü aser timtem lemsateptsü kisüng asoshi tongtibang sabang ka dang masü saka district atema scheme aser project tem agizüktsü aser aji mapa küma inyaka aotsü asoshi senden nung lemtetba onük temji kanga dang nüngdak, ta S. Pangnyu-i ashi.
Maneni, iba senden nung DPDB board-i 49 A/C Tamlu aser 50 A/C Longleng atema LADP 2019-20 agizüka liasü.
Iba den külemi, CMO office aser district hospital, Longleng nung retaining wall yanglutsü atema tim department nem tetuyuba agütsü.