Tuensang nung tzünglu aruba ajanga ki asem raksa

Dimapur, Luroi/August 13 (TYO): Tzünglu maneni aruba ajanga Tuensang jila kübok High School B Ward, Middle Sector nung retaining wall ka jirepa ki asem tashi raksatsüogo.
Iba lendong ya Agust 10 nü nikongtsütsü 6:30 shi nung atalok. Wall chirepba ola angashiba sülen Tshelhi-u NCS, EAC (HQ) iba tesemi aritepa ao aser tensa asadanga liasü. Civil Defence aser Home Guards nungi sepai den kiyonger temi ki raksar aliba mürekteta liasü.
Deputy Commissioner (DC) Tuensang, Mohammad Ali Shihab IAS-i anir district administration-ia iba tesem Deobarnü semdanga Tuensang District Disaster Management Authority (TDDMA) kübok teyari agüja liasü.
Ki asem ya Yaongyimti nunger Yangba, Tuensang nunger Khomong aser Yaongyimti nungersa Soyen’er ki liasü, ta DPRO Tuensang sangdong ka ajanga metetdaktsü.