Dengue tashidak azüoktsü asoshi mera agiba osang Delhi HC-i meshir

New Delhi, September 17 (Agencies): Tawa arishi küm asem aser arishi küm teku tain tetsür chanu ana asüba densema linük yimtiba, Delhi yimtiba nung dengue tashidak agi shiranga asür nisung 16 ajungba osang ka ketdangsertemi tanü Brehostibar nü metetdaktsüogo.
“Tanü tashi nung Delhi nung alir nisung 2000 dak tema dengue tashidak keta aliba osang bushiteta lir,” ta shia, küm 5 tsüngda nung dengue tashidak ya tan tesashiba poktetba osang ka Delhi Municipal Corporation ketdangsertemi tanü metetdaktsüogo.
“Delhi anülulentip tsütsü Sangam Vihar nung alir arishi küm 3 tain Neha Mathur yashi, Bodhbar nü Saket City Hospital nung asüba aser Okhla kiyong nung alir arishi küm 9 tain tetsür chanulaji tan September ita 15 nü RML hospital nung asüba jangjaogo,” ta doctor temi osang jangjashitsü.
Ano külen, Delhi nung dengue tashidak kanga sashia prokshiba atema tebilemtsü khuret benoka Delhi High Court-i iba tashidak azüoktsü asoshi Centre aser Delhi sorkar nati kechi mera agia ali iba osang jangjashitsü tetuyuba ka tanü agütsüogo.
Chief Justice G Rohini aser Justice Jayant Nath na densemba okadak mendeni Delhi nung tentetba municipal corporation 3 aser New Delhi Municipal Council (NDMC) danga dengue tashidak prokshiban azüoktsü asoshi mera agiba osang tejangja agütsütsü tuyuogo.
Centre sorkar, Delhi sorkar, municipal corporation 3 aser NDMC temi osang tejangjaji tan September ita 24 nü tashi nung benoktsü metetdaktsüogo.