Arunachal Pradesh nung NSCN-R teseptem makdok

Bordumsa, August 13 (Agencies): 73 buba Independence Day amungtsü lia Hombar nikongtsütsü Arunachal Pradesh kübok Changlang district nung sepaitemi NSCN-R indang teseptem makdokogo.
Jairampur aser Changlang nung amenoka aliba 13 Assam Rifles aser Changlang district police yaritepa iba mapa inyak.
“Independence Day matongdang telungpurtemi mapa tamajung meinyakdaktsütsü atema security forces-i district nung telungpurtem anema mapa inyaker” ta Changlang SP Romil Banniya-i ashi.
Taoba hopta ka tsüngda New Jukhi, Old Kamlao aser Kovin Honkap nung National Socialist Council of Nagaland-Reformation (NSCN-R) indang tesep asem bushiteta makdokogo, ta paisa ashi.
“Taoba ita trok tashi tenem tekong tasak nung mapa inyaka arudang NSCN-R züngsem 33 tashi puogo” ta Banniya-isa metetdaktsü.
“Sepaitemi apuba telungpurtem rongnung Capt Wangjin Pantha, Capt Soltin, Rajapio Wangdi nungertem lir aser parnok ya 2009 nungi mapa inyaka arurtem lir” ta paisa shisem.
Iba mapa inyakdang tawa tu Myanmar senso ta temulung malemer nisung 6 tahsi puogo, ta paisa ashi.
Changlang district kübok Old Jukhi, Magantong ,Jongram, Old Kamlao, New Jukhi aser Kovin Honkap tesemtem nung telungpur teseptemji makdok.
Taoba ghonda 48 tsüngda sepaitemi item teseptem nung chiyungtsü, chibo-aonbo, camouflage süoshi aser prangpong-injangtem ngutetogo. Iba mapang azü shi dena angu.
Taoba mapang AK prangpongtem anguba sülen National Socialist Council of Nagaland-Khaplang (NSCN-K) indang tesep ka makdoka liasü.
Changlang district kübok Jongrom aser Laibong nung tesep anaji amenoka liasü. Iba ya India-Myanmar arrtsü anasa lir.
Telungpur telok aikati I-Day mokdangtsü ayongzükba sülen security akangshiogo, ta SP Banniya-isa metetdaktsü.