Shincheonji yimsü magizüktsüla: Manipur Baptist Convention

Guwahati, August 13 (Agencies): India kübok Northeast nung Khristan yimsü arur küm 100 tema süia arudang timtem ka ajurua lir.
South Korea nungi taila tamangba yimsü telok kati Northeast nung Khristan yimsü atema lendong ka bentsür arua lir aser ibaji talisa Manipur nung lir.
Manipur nütsüng yongsük 40% dak tema kaji Khristan tamangertem lir.
South Korea nungi Shincheonji ta ser taila tamangba yimsü amanger telok sülen anidakertem aika renloka aoba ajanga Manipur Baptist Convention (MBC)-i tamangertem dang tekümdangtsü osang sangoktsüogo.
Manipur nung Baptist Church kübok züngsemtemi Shincheonji telok nungi pilaa alitsü atema iba tekümdangtsü osang metetdaktsü.
Northeast kübok state teimba ka nung Khristan tamangertem aika lir aser iba nung Nagaland aser Manipur nung Baptist Church tamanger aika lir.
“Manipur Baptist Convention nung reju aser arogo ajaki South Korea nungi ‘Shincheonji’ ta ser lendong aketba taila tamangba yimsü amangertem dang nungi jenbua alitsü metetdaktsür” ta MBC general secretary Rev. Wungnaoting Konghar-i sangdog ka nung metetdaktsü.
“Parnok lennir MAN-HEE LEE-i tanga pastor temi memetetba miim lai o tem meteta lir ta parnoki ashir. Shincheonji sülen anidakba aser tesayubatem angaba ajanga dang nisung kati Tsüngrem metettsü akok ta pai ashir” ta Konghar-isa metetdaktsü.
“Manipur nung nisung aika aser talisa lanurtemi Shincheonji tesayubatem amangtsü tenzükogo. Parnok onok city churches telungi aitogo aser tiyazü Lai tesayubatem ajanga lanurtem atsür aotsü meranger” ta paisa ashi.
“Parnok tesayubatem ajanga arogo züngsemtem tsüngda meputep aser temulung melemtep adokdaktsüogo. Manipur nung lanur aika parnoki tesayubatem sülen anidaker ta onoki osang angazükogo. Anungji, onoki nenok ajak dang aser lennir ajak dang kümdangtsü alitsü mepishir” ta Konghar-isa metetdaktsü.
Nisung ajaki Shincheonji indang osang ya prokshitsü ayongzüker, ta paisa shisem