Sonowal-i Amit Shah dang sepai talila meshi

Guwahati, August 14 (Agencies): Assam Chief Minister Sarbananda Sonowal-i yashi New Delhi nung Union Home Minister Amit Shah den ajurutepa onük aika lemsatep.
Iba mapang August 31, 2019 nü National Register of Citizens (NRC) adoktsüba aliba dak sendakba nung law & order tensa atema jembi.
Sonowal-i Home Minister dang NRC maparen indang osang metetdaktsü aser iba denji külemi Assam tensa indang ashi.
Sonowal-i Assam nung security forces talila yoktsüla ta ashi aser ibaji Amit Shah-i mulunga agizük.
NRC adokba sülen tensa azüoka ayutsü atema Centre-i sepai talila yoktsü aser Assam nung alirtemi tensa meraksatsü mepishir, ta Home Minister-i ashi.
Centre sorkari Assam nung NRC maparen tenzükshitsü aser jangjashitsü atema takhangba agütsüba Supreme Court-i August 13, 2019 nü magizük.
NRC indang data ji Aadhaar ama asütsü aser final NRC list atema anogo matsülangtsü ta Supreme Court-i metetdaktsü.
Yashi Sonowal-isa Amit Shah dang Assam nung tzümetsüng tensa indang osang lemsatep aser teraksa bentsür aruba osang tejangja metetdaktsü.
Shah-i Sonowal dang akokba tashi tzümetsüng agi timtem ajuruba tesemtem nung mapa inyaktsü atema teyari agütsütsü ta nangzük.