Charles Chasie aser Dreamz Unlimited nati Governor’s Award 2019 agizük

Kohima, Luroi/August 15, 2019: Raj Bhavan nung August 15, 2019 nü Governor’s At Home sentong agiba mapang Nagaland Governor, R.N. Ravi aser Chief Minister Neiphiu Rio naprongla den tena kinungtsü aser Arts, Music &  Literature nung Governor’s Award 2019 agizükertem külemi tangokba noksa ka yangi angur. 

Dimapur, Luroi/August 15, 2019 (TYO): Durbar Hall Raj Bhavan, Kohima nung August 15, 2019 Brehostibarnü 73buba Independence Day benjungmung sentong ayonga agiba mapang Literature & Arts telemsa nung Charles Chasie and Dreamz Unlimited nati Arts, Music aser Literature nung 17buba Governor’s Award 2019 agizüka liasü.
Governor’s Award agizüker nem senpet sen lakh 5, Silver Plaque, Certificate aser Shawl sempettsü.
Nagaland Angh, R.N Ravi-i award agizüker dang pelaba ashidang, paisa, linük asoshi iba ama tongtibang anogo ka nung Art, Music aser Literature wadang tsütsü sempet tajung alir tetsür aser tebur tem shima tetushi agütsüba asoshi state sorkar dang peleba metetdakja liasü.
R.N Ravi-i, art, music aser literature ajanga lokti ka indang teimla aser tejangraba sayur. Tanü putu nung Naga nunger ya tesüiba küm meyirijang dak tema benshia aruba yimsü aser sobaliba balala indang senmangertem lir.
Akhi tejen putu mapang benshiba sobaliba tajungtem angazüka aser itemji Naga nunger nüburtem dang metetdakja aser sayutsü asoshi Ravi-isa Naga artists aser Musicians tem ajungshia liasü.
State nung lanurtem pei mangdang sülen anidaktsü aser ibaji ajanga state aser linük asoshi naroküm bener arutsütsü asoshi tarutsü nunga sorkari sempet tajung aketba lanurtem ajungmesotsü imlaba indang ka R.N Ravi-i lemsatep.
Kasa sentong nung, Nagaland Chief Minister, Neiphiu Rio-ia, lanurtem ajungshia aser nungitba asoshi Angh dang pelaba metetdaktsü.
Rio-i, Naga nunger dak sempet tajung aika lir saka maongka tajung manguba ajanga item sempetji bendanga agüja mamshir, ta ashi. Tesüiba mapang, Naga nunger lokti sasep nung iba ama sempet tajung sayutsü asoshi tetsükdaktsü aser timtem balala ajurua aruogo, ajisüaka tayongzükba jenti liakasa music, arts aser literature tsütsü Naga nunger aikati takok tajung nguogo, ta Rio-i metetdaktsü.
Charles Chasie ya Kohima nung alir Journalist aser Author ka lir. Nagaland lokti sobaliba aser politics onük nung kongshia züluba kaket aika pai adoktsüogo.
Charles-i züluba kaket rongnung ” Age-old ties: Pfutseromi & Khwuno Thevo” (2013), “Bearing Witness” (2011), “Nagas Today: Indigenous Discourse” (2010-11), Geeti Sen’s Edited ” Where the Sun Rises When Shadow fall: The North East” (2006) aser “The Naga Imbroglio : A personnel perspective” densema lir. Charles-isa documentaries talisa “The beginning of life” aser “For the sake of Tomorrow” na direct aser produce süa liasü.
Literarure wadang tsütsü Charles-i shilem tajung agiba atema 2007 küm Media Trust award agizüka liasü.
Dreamz Unlimited ya Dimapur nungi Theater & Film Production house ka lir. New Delhi nung National School of Drama-i NEZCC, Dimapur den longjemer theatre workshop sentong ayongzükba sülen 2008 küm Dream Unlimited telok tentetta liasü. Arogotem, lokti tentet, NGOs aser Sorkar Department nung temelenshi adokdatsütsü tayongzükba tulu nung lokti dak sendakba otsü den külemi asayamenü nung ajemdaker jilushi balala sayuogo.
Nüngtugu video sabang YouTube nunga Dreamz Unlimited ya channel lapoka lir, kong par teloki mapang shia tawa tanü tensa den apet video balala tangokba sayur.
Tang, Dreamz Unlimited channel nung subscribers 2,17,000 dak tema lir, koba Nagaland nung timtiba asütsü. Dreamz Unlimited, Founder aser Director, Tiakumzuk Aier-i 2017 November nung ‘Nana: A Tale of Us’ film atema Golden Calton best Director Award agizüka lir.
Maneni, iba sentong nung Director Art & Culture, Puchosale Yore-i Governor’s Award 2019 indang tatsü agi rasa ashi. Kasa mapang Additional Chief Secretary & Development Commissioner, Sentiyanger Imchen-i tepela anküp o jembi.