Ni Kodang Tambur Südir (T.Ken 71:1-11)

Tambur, tantsür asoshi iba ken ya kanga tanganütsü ken ka lir. Iba yagi tambur akümdang Tsüngremer temoatsü nung balaka rangloker. “Tambur tia nung nai ni teindok; tashi makai akümdang nai ni senzüka teyutsü” (t.9).
Asenok tambur akümdang Tsüngremi asenok asoshi kechi inyaker? Asenok tain kümer tebilemtsü agi atongdang Pai asenok yarir. Tashi mait tatishitsü. Tekong 9 nung Dawidi kechi indang jembir: “Tashi makai akümdang nai ni senzüka teyutsü.” Tema takümji tashi meiti akümer, saka telunglen anogo shia tasen kümshitsü akok. Tsüngremi ne nüngdakba tanelaren tashi agütsütsü.
Asenok tambur aküm tanga tebilemtsü ka asenok ajurubaji ratamata. “Ne dak, O Kibuba, ni kü tamang ayur: Ni kodanga taakdaktsü” (t.1). Iba lima nung aika melenshia aodang tambur küma aodang asenoki ashitsü, “Kechi ataloker ni memeteter.” Saka Tsüngremi ashir, “Reprangang, iba indang shisa tebulu. Kü dak amangang, aser ni na kodanga ratamata meyutsütsü.”
Tasembuba tebilemtsüji tesüiba menungraba. Aiben asenoki jembir, “Tejenba anogotem tajung to meyipang.” Dawidi ashi, “Kechiaser na kü teyimla lir, O Kibuba Tsüngrem” (t.5). Pa tarutsü mapang lia liasü. Tarutsü sota lir, asenoki memetet, saka Tsüngreni asenok tarutsü lia sotta lir ta asenoki metet.
Tatemsa asenoki nemnemshishi tebilemtsü ajurutsü akok. Tambur akümdang melamela nemnemshishi asür. Saka Dawidi ashi, “Anogo tepiyong ne nüngsang agi, aser na tushiba agi kü bang sünga alitsü” (t.8). Kodang asenoki Kibuba den jajadir, Pai tashi mait aser terata ajak anebalur. Tarutsü tetsübu ajak pai repranger. Nemnemshinem melen Pa tenüngsang asangba agütsür, anungji asenok tesünep nung tambur, tantsür akümer.
Taküm jenjang shia tejangja maongka aser tebilemtsütem lir. Aser item ajak ajanga Tsüngrem ne den lir. Na tambur tebilemtsü ajurur asü? Na tashi mait, terata, aser tesüiba menungra a nemnemshishia alir asü? Ne tetsübutem Tsüngrem dangi bener arung. Pai pa nüburtem yariba nung pelar.