Sen nem bushidaktsütsüla

Yakanü tebu tedi tajung ka den sensaksemdang, asenoki sen mebushitsüla saka seniang asenok bushitsüsa asenoki inyaktsüla aser asenok alitsüla ta ashidang, tangatetba tajung tasen ka nguogo ta kanga pelaa bilemogo. Pai ashibaji, kodang jungjunga bilemdangdir, asenok Nagaland nung alir tuluba nungi tilaba tashi ya sen bushirtem dang lir ta reprangtetter. Anogo shia asenok jajaba, jembiba aser inyakba ajak sen asoshi dang jajar, jembir aser inyaker saka kodanga meperir. Aji oda, state government nungi shir telok ajunga sen bushirtem dang lir, ajisüaka kümshia tanguba dang nungibo teindokba teimba ser sentsü nung atemba asenoki küm shia angashir. State government tenüng nung Kohima nung Secretariat aser Directorate shia nung inyakba ajakji sen angutsü asoshi dang inyaker. Kasaji Kohima nungi yimsüsürtem Delhii aobajia sen meshii aorba dang lir, saka kechiba senotsü agi tanüngba-tanüngba dang akümer (?) ta bilemdangtsüba mapang ka agi asenok tonga lir. Atangji, sen bushibaji tim dang, kechiyong alima nung asenoki bilemba, jangraba aser aginüba ajak inyaktettsü aser ngutettsü atema rongsen nüngdaker, iba jagi asenoki senotsü bushir. Aji oda, rongsen bushidang asenok shisabolur, meputepa adoker aser arishia tatsüba akümer. Rongsen bushidang asenok tai menar, mera maket akümer aser aika den tsükchiteptsüsa akümer. Talisa yimten nung lenirtemi rongsen bushidang nübortem kanga akoksadaktsür aser alima topur majung akümer. Atangji, ken bilemtsübo asen taküm, kibong aser asen lima ajungtsü atema rongsen bushitsü nüngdaker, anungji bushitsüla ta bilemer. Ajisüaka, tebu tedi shisatakasangi ashi ama, asenoki rongsen bushitsü melen rongsen nemang asenok bushidaktsütsüsa asenoki inyaktetra, iba jagiang asen lima aser asen nübortem ajak takar küma anisüngzüka lidaktsütettsü. Tangbo asenoki rongsen yong asen taküm aser kibong ayoktsüa mapayur. Rongsen nem asenok yimten temeten aser meraket ajak alizükdaktsür. Sen angutsü asoshibo mapa tamajung inyaktsüa menumgnangi inyaker. Item ajakji asenoki seni asenok bushitsüsa meinyaktetba ajanga lir. Asenoki sen bushitsüba masü saka seni dang asenok bushitsüsa asenoki inyaktsübaji asenok kibong nungi tenzüktsü tim. Aji oda, sen nem asen bushidaktsütsü melen anogo shia asenok sen bushia ayanglen dang senzüra, ashiko, iba kija jagibo kibong nüngdaka meperitettsü aser shilumanem aser asüama ajuru dangbo kanga timatemtsü. Iba tangatetba nungji asenok dangi sen arutsüsa asenoki mapa kar apiteta inyakra, asenok sen bushilen ayanga mejajayonga seni asen akaba bushia arutsü. Iba kasaji government-ia inyaktsü tim. Aji oda, goverment-i Nagaland tesem ajaklen alima bendang semer nungi anogo shia raliwalirtem arua amongdak tesem asütsüsa yimtak yimtsüng aser town-tem nung dang masü saka tenem aser ayongtem agi amongdak tajung küma mesemteta yutsütetra, asenok sen bushii aotsüba masü seni dang asenok bushia arutsü. Iba amaji medical college dena mozü ki tajung tulu anasemka danga lapoktet asübo, yangji taneptsü bushii arurtem senzütsü gari, tanendak ki aser chiyongtsü renemtsütsü pur Naga nungertem aika mapa ngula aser anogo shia nisung meyirijang agi sen semer asenok bushia arula. Iba amaji asenoki aluyimba nungi chiyongtsü tapu balala züsenteta, itemji kar tamen aser kar tazü ta chiyongtsü tapu balala küma yanglutet asüba, itemji alii tangar sen semer asenok bushia arula. Iba amaji asen lima nung Tsüngremi aremoka yutsüba rongsen aika lir, itemji agiteta asenoki amshi ashi asübo, tangar bendang ter nungi sen bener asenok bushia arula. Tangbo asenoki meinyaker aser inyakdi asüyonga mashi aser memetet, anungji temejangbo rongsen madak mejanger saka anogo shia temeli agi apu lar sen bushilem tulu tila na prongla senzür. Joko, iba amaji sen bushilen mesenzüi sen nemang asenok bushidaktsütsüsa Nagaland government-ia nübortem asoshi langka takitsü kabo inyaka toktsü meshiogo aser Naga nungertemia peisasa apiteta inyaktsü mapang tongogo.