Uttarkashi nung Relief Helicopter ka tsükoka nisung asem asü

Uttarkashi, August 21 (Agencies): Uttarakhand state kübok tzümetsüng tensa aliba Uttarkashi district nung relief aser kümzükba maparen inyakba helicopter ka tsükokba lendong nung tayimtsü nungji mena alir nisung asemprong süogo, ta ketdangsertemi metetdaktsü.
State Disaster Response Force (SDRF) PRO-i, tanep helicopter tsükokba lendong nung nisung asemprong süogo, ta metetdaktsü.
Tzümetsüng aliba tesem nung relief chiyungtsütem agütsüba sülen meyipa arudang helicopter ji Moldi anasa tsükok, ta Uttarkashi Disaster Management officer, Devendra Patwal-i metetdaktsü.
Iba lendong nung asür asemji Captain Lal, Co-pilot Shailesh aser lispour ka tenüng agi, Rajpal nunger liasü.
Twitter ajanga state Chief Minister, Trivendra Singh Rawat-i mangyim jashi lemsatepogo.
Tzümetsüng ajanga Amongnü Uttarkashi district kübok Mori nung nisung 16 asü aser nisung 12 shi samar bushidar.
Aviation regulator Directorate General of Civil Aviation (DGCA)-i helicopter tsükokba kuli bushisüngdangtsü atema team ka lemzüktsüogo.
Aircraft Accident Investigation Bureau (AAIB)-i iba tatalokba bushisüngdangtsü, ta ketdangserisa metetdaktsü.
Chief Minister Rawat-i Uttarkashi District Magistrate aser Disaster Management Secretary dang tzüametsüng agi kongshiba tesemtem nung kümzükba maparen inyaktsü aser relief agütsütsü tuyua liasü.
State sorkari kümzükba maparen inyaktsü atema Indo-Tibetan Border Police (ITBP), NDRF aser SDRF teams nem mapa lemzükja lir.