DNSU-i kaketshirtem dang sangdonger

Dimapur, August 23 (TYO): Dimapur Naga Students’ Union (DNSU)-i kaketshirtem dang lenla ajak nung tazüokba alitsü metetdaktsüogo.
DNSU Media Cell-i sangdong ka ajanga, class agiba mapang nung class nung medeni uniform agir nemzüa senzür kaketshirtem, moko balala achirtem aser kaketshir lokti tenüng menüktsütsüsa mapa inyaker kaketshirtem khenyongi magizüktettsü, aser mapang shia ajungben mita aotsü, ta metetdaktsü.
DNSU-isa restaurant/hotel kiburtem dang kaketshirtem uniform nung marudaktsütsü aser item ama kaketshirtem arura Union nem osang metetdakjang, ta metetdaktsü.
Union-isa dokan kiburtem dang shisaliok rejutem nungi yard 100 (feet 300) telongtet nung moko chiyungtsütem mayoktsü, arishi küm 18 tekübokpurtem aser uniform agia aliba kaketshirtem dang moko mayoktsü metetdaktsü; aibelenertem nem temerenshi tulu agütsütsü, ta metetdaktsü.
DNSU-isa shisaliok rejutem, tsüraburtem aser nüburtem dang amalitepa inyaktsü mepishia metetdaktsüogo.
Office den tongteprateptsü atema Secretary Education & Statistics, DNSU, Tenyebinlo Himb den phone no. 8415070616/9436074387 ajanga metetpelatsü akok.