Govt mapa nung shimba yimya

Nagaland government inyakyim meshitaki akümba kuli aika rongnung tuluba kaji government mapa nung inyaktsü asoshi shimba yimya ya asütsü. Shitakba agibo government mapa nung inyaktsüba ya kechi mapa nung shiba shimdir shimaka, jungjunga tendanger külenang mapa metetba aser inyaktsü akokba tetemsü aser tenendak nisungtem dang shimtsüla, kechiyong item jagi dang yimtena meraketdakja aser nübortem nüngdaka reprangteta tenzüktsü. Ajisüaka, Nagaland nungbo Nagaland Public Service Commission (NPSC) ajanga ‘Combined Competitive’ tatidang agiba dak alaka government mapa nung shimtsü atema tanga tatidang agiba osangbo mangashir. NPSC ajanga agiba tatidangji government mapa nung tongti ketdangsertem EAC mesüra DySP mesüra jenjang tulu nung amentsü purtem asoshi dang agir, anungji itemjibo küm nung ter metsüka dang shimtsü, ajisüaka küm shia department balala nung noklang dak tali government mapa nung tasen aniokertem yabo kecha tatidang magi government nung alirtemi pei shimnüba shimer. Iba jagi Nagaland nung, tanga mapatemjibo yutsür, kaketreju balala nung sayutsü asoshi tesayurtem shimba aser Police department nung sepaitem shimtsü asoshi tatidang agiba osang kangabo mangashir. Itemji dang masü saka Nagaland nungbo , ashiko, engineer mazüng ser nung engineer shimba mesüra computer amshi mashi ser nung computer assistant shimba purtema alitsüa akok. Aji oda, lesson tanga bushiloka sayutsübajibo yutsür tazünga junga mezüngtetba purtem dena school nung sayutsü tesayurtem shima alitsüa akok. Item ama jagi meteta aser memeteti Nagaland tangar memenepi atsüngzüker. Government mapa nung inyaktsü shimba ya ita sen chia alitsü asoshi shimer masü saka government sentong nung aliba ama nübortem tenzüktsü shimer aser inyakba yari ita sen agütsür. Atangji, asen lima nung government mapa nung tatidang magii shimba ya tanü tasen masü saka state kümli nungi inyakyonga aruba tim masüba inyakyim ka lir. Nagaland state akümdang, Nagaland government mapa nung inyaktsüsa Naga nunger tazünger tetemsü mali asü, anungji  tazünger nüngdakba mapatem nung tsümar shim aser school tesayur ama aser teküpbok jenjang nung aliba mapatem nungang Naga nunger shim. Iba jagi tawa tashito Nagaland civil secretariat aser directorate ajak nung tsümar dang liasü. Iba amaji government mapa nung inyakertem shimtsü asoshi inyakyim takang ka makai aruba ajanga tanübo office aika nung mapa inyaki marur aser aruyonga mapa inyak mashi temeimtsüka aser tejashitsüka ajurur. Joko, Nagaland-a yamaisa aotsü masüji, asenoka temsüa alir aser nendaka inyaktsü purtemang shimtsüsa tanga state nung ama inyakyim tasen ka tenzüktsüla. Iba inyakyimji tang Nagaland nung NSF teloki dena  Nagaland government mapa nung inyaknertem jaoka tatidang agitsü asoshi ‘Nagalans State Staff Selection Board (NSSSB)’ ka tentettsüla ta akangbaji asütsü. Yimten nung ketdangser ka tetemsübo metemsü saka shimba agi state rajang kümdaktsütsü. Shiranger anepalubo mashi aser mozü tenünga junga memetet ta ser kodaser mozü kidang medical doctor inyakdaktsütsü ? Kenyongi pei taküma dena mazüoktet chiajemer saka police shimjito, koda asütsü ? Junga azüngba nisung masü, kaket nung zülua alibajia junga mangatetter saka tesayur mapa inyaker. Ibaji koda taoksatsüka aser takoksa tulu asütsü ? Joko, Nagaland-a tain kümogo, anungji yimsüsürtema mejanga yur, mapa memetetyonga pei kinunger, yimer aser party pur apia government mapa nung  shimba sobaliba tamajung yabo anentsüla. Iba ama inyakyim yagi Nagaland telongi ludagi. Atangji, tatidang magii shimba purtemji Naga nungerbo Naga nungersa asütsü mesüra Aorbo Aorsa asütsüa akok, saka mapa mashi memetet ka ita sen kisüng chia alitsü asoshi shimbaji peisasa suseta asütsü sentong atonger amai asütsü. Joko, Naga nunger lanurtema aikati government mapa mebushii peisasa nübortem asoshi nüngdak ajitetba mapatem inyaker, ajisüaka ano government mapa bushirtemsa teimba, anungji tajunger aser temsüa alirtem government mapa nung anidena Nagaland yanglushiba nung shilem agitettsüsa, kinunger aser party pur apia masü saka temsüa alir tajung purtem shimtsüsa NSSSB ji alitsü kanga nüngdaka kümogo.