PDA lennirtemi Khristan tanishirtem den ajurutep

Dimapur, August 27 (TYO): NDPP aser BJP nungi lennir tejentemi Peoples Democratic Alliance (PDA) tenüng nung Nagaland nung Khristan lennirtem den ajurutepba senden balala menogo.
Parnoki Bishops House Kohima nung Nagaland Bishop Bishop James Thoppil aser Nagaland Baptist Church Council (NBCC) office nung General Secretary Rev. Dr. Zelhou Keyho aser Finance & Property Secretary Rev. T. W. Yamyap Konyak nunger den ajurutepa senden amen.
Iba mapang BJP aser NDPP lennirtemi NBCC aser Bishop dang PDA sorkar ya nübortem sorkar ka lir aser yimjung, putepa alitsü, terenlok, tamangba yimsü tsütsü mashitsü aser sorkar ketdangsübaren nung tashishitsü melii inyaktsü tangatetba nung kümtetba lir ta ashi.
Taruba anogotem PDA-i arogoi ashiba onük aser tebilemtsütem asoshi inyaktsü aser arogoia menungnangi sorkar den tebilembatem lemsateptsüla ta lennirtemi ashi.
Nagaland ya Khristan state ka asü nung Arogo aser sorkar tsüngda tesentaktep akangshitsüla ta PDA-i bilemer. Arogoi sensotem tanüla tsütsü renlokdaktsüba dang masü saka state nung terenlok mapa inyakba aser telemtetbatem agiba nunga tongti shilem agir, ta PDA Media Cell-i sangdong ka nung metetdaktsü.
Bishop aser NBCC-i parnok tebilembatem otiotia lemsatepba atema kanga pelar aser Nagaland ajangzüktsü aser aintsü atema tarutsü nunga iba ama sendentem amentsü, ta Media Cell-ia ashi.