Plastic pollution dak sendakba nung sentong ka agi

NU SASRD Medziphema Campus nung August 27 nü plastic pollution dak sendakba nung sentong ka ayongzüka aka dang tangokba noksa nung angur.

Dimapur, Luroi/August 28 (TYO): “Minimising plastic pollution for cleaner environment” omen nung ajemdaker Eco-Club & SU: SASRD aser Atsi & Co longjemer NU SASRD Medziphema Campus nung sentong ka August 27 nü ayongzüka agiogo. Iba sentong nung Kevin Zehol tetushi tesemdanger liasü.
Sentong nung o jembidang tetushi tesemdangeri plastic ajanga alima menentsüba agi lendong bener arutsüba tem indang metetdaktsüba den plastic tajemba amshia iba tebilemtsü nokdangtsü atema tangazükba agütsütsü nüngdakba lemsatep. Paisa, yimyim ayimba ajanga asen tzümopung nem teyari magütsütsü aser kümzüka mayutsü saka khuret angatetba senso ka ama tarutsü putu atema tzü mopung wazüka ayutsü ya asen mapa lir ta ashi.
Event coordinator NITCA, Atsi Jamir-i iba sentong ayongzüka akaba indang lemsatep aser iba sentong ya mapa küma inyaka campus plastic free zone kümdaktsütsü ta ashi.
Iba sentong ya SU: SASRD, General Secretary Atsungpong Longchar lenisüba kübok aka aser Moangsenla Pongen-i sarasadema tenzük. Sentong nungsa environment pollution dak sendakba nung saya tatsüka Eco-Club SASRD-i ai aser Eco-Club: SASRD tir Wonchibeni N. Odyuo-i tepela anküpo jembia liasü, ta ketdangser sangdong ka ajanga metetdaktsü.