ISL: Hyderabad FC-i FC Pune City melenogo

New Delhi, Luroi/August 28 (Agencies): Indian Super League (ISL) 6buba nung Hyderabad FC-i shilem agitsü. Parnoki FC Pune City melentsü, shirnok senotsü tsütsü timtema arudar.
Team tasenba kibur ya Vijay Madduri aser Varun Tripuraneni na lir aser par club ground ji Gachibowli Stadium asütsü. Ajisüaka home venue nungi ano official osang mangazüki lir.
Pune City puri Indian Super League season pongububa nung asayar aser staff tem nem itasen magütsüteti kangshia liasü.
“Hyderabad yimti kong football asaya kanga nüngtugu lir, iba yimti nungi taruba Hero Indian Super League season nung team kati shilem agitsü,” ta ISL sangdong ka ajanga metetdaktsü.
Pune City kibur Wadhawan Group pur senotsü tsütsü timtem aliba ajanga club shibangtsüsa akümer ta angateter.
Kasa mapang nung Chennai City midfielder Nestor Gordillo inyakyim shidak mesüi alizükba atema FC Pune City pur season ana tashi asayar transfer asütsü tenokdangba agütsür liasü.
Madduri ya University of Texas nung MBA zünger alir ka lir aser pa Hyderabad nung amendaker aliba digital integration service provider Incessant Technologies indang CEO küm 10 shi inyaka arudar
Taoba software engineer ya Virtusa India Pvt Ltd nung sales and client services director ama inyakogo aser Yale School of Management nung küm ka executive leadership program nung shilem agiogo.
“State nung football asaya renloka aoba nung ni tongtibang shilem ka agitsü yongyaa atar. Saisapong ya kü azü nung keta lir aser iba lenla nung shilem agitsü maongka anguba atema kanga pelar,” ta Vijay-i ashi.
Tripuraneni-i football nung professional shilem ka nungi club co-owner ama shishilembar ka shilem agitsü meyipogo.
Pa ISL tenzükba küm Kerala Blasters team manager liasü aser Chennaiyin FC Chief Operating Officer mapa dena inyakogo. Maneni pa Kerala Blasters FC CEO mapa dena inyakogo.
Paisa Chennai Football Association tir mapa benogo.
Tripuraneni-i ashiba agi, “Hyderabad yimti nung football mapang talangka nungi jangrabangra asayaa aruba otsü lir. Ni stakeholders tongtibangtem den inyaka club kanga junga amentettsü yongyaa atar aser iba ajanga lokti aser yimti nem tajangzük aser naroküm bener arutsütsü.”
ISL ya October 20 nü Kochi nung Kerala Blasters FC aser ATK na asayaa tenzüktsü.